Tabata dia 2 di november ultimo cu personal di Wardacosta a topa cu un boto pega cant’i lama na Santana di Cacho. Hunto cu polis y Guarda Nos Costa a cuminsa cu henter un buskeda den Sero Colorado pero sin resultado.
A topa cu basta “life vest”, riba beach, den e area di Big Mama Grill y den mondi den Sero Colorado. E unidad di K9 unit tambe a yuda cu e buskeda. E dia specifico ey, e helicopter di polis no a lanta. P’esey mes a haci e buskeda mas dificil pa e departamentonan hudicial. No ta cu e helicopter tabata daña, mirando cu mientras e buskeda tabata andando, e helicopter tabata drumi bou dak na Kazerne di Brandweer na Tanki Flip.
For di e dia ey no a ricibi un contesta concreto for di e mandatario encarga cu husticia, riba e motibo di e ausencia di e helicopter. Danki na e bon trabou di e unidad di polis cu ta controla costa, cu den cared’i 3:00 am a bin topa cu un persona indocumenta cerca di e tent caminda Heintje Ras ta mantene su mes bezig.
Diamars, durante un conferencia di prensa, e mandatario encarga cu husticia a comenta cu te ainda e no a ricibi un splicacion di e “pakico” e helicopter no tabata presente. Tjon a splica tambe cu no tin ningun problema cu e helicopter y cu e ta bula manera mester ta. Pues, awo ta cuestion di saca afo, sea e piloto of e polis encarga cu e helicopter no tabata disponibel pa yuda cu e buskeda den e mondinan scur di Sero Colorado.
