Cifra di e turistanan stay-over di luna di october 2021 ta conoci. Aruba ta siguiendo su curso di bon recuperacion compara cu october 2019, cu tabata un aña sumamente positivo pa turismo di Aruba.
Segun Minister di Turismo y Salubridad, Dangui Oduber, a recupera 88% di nos turismo den luna di october 2021. A ricibi 70.053 bishitante. Ta importante pa bisa cu nos mercado mas importante, e mercado Mericano, a recupera 94% di nos turistanan Mericano, compara cu october 2019.
Sigur esaki ta un señal hopi positivo pa nos mercado di mas importante, cu ta e mercado cu ta trece mas turista pa nos y cu mas ta contribui na desaroyo di nos economia cu nos ta recuperando casi, yegando 100% caba.
Por mira un tendencia di ultimo lunanan con cada luna cu pasa ta recuperando mas turista compara cu 2019, cu tabata un di e miho añanan den historia di pais Aruba.
Ora compara recuperacion, ta compar’e cu 2019. E proyeccion cu tin pa e siguiente lunanan cu ta november, december y tambe e temporada halto cu ta na caminda, ta proyectando un recuperacion di mas di 100%, compara cu 2019, cual sigur ta un indicacion cu Aruba ta progresando.
“Nos ta bayendo den e direccion cu ta desea pa bay. Ta mira pa loke ta e cantidad di asiento cu tin disponibel pa aña 2022, tin casi 1.8 miyon asiento disponibel a Aruba. Esaki ta demostra e confiansa cu aerolineanan tin den nos destinacion, a pone asina hopi asiento disponibel. Awo ta cuestion di inverti den mercado pa por yena tur e asientonan aki, pa asina den 2022 recupera tambe 100% di nos turismo, compara cu 2019, pa asina por crea oportunidad nobo, crea e cuponan di trabao cu a bay perdi, stimula economia y na final di dia crea entrada pa gobierno di Aruba cu ta hopi importante pa asina na final surpasa e crisis cu COVID-19 a ocasiona pa pais Aruba,” minister Oduber a indica.
El a agrega di ta hopi satisfecho con turismo ta recuperando, ta satisfecho cu e proyeccionnan y tin pleno confiansa cu pa e temporada halto ta bay yega 100% recuperacion y sigur pa 2022 tambe lo bay recupera nos turismo 100%, el a bisa por ultimo.
