Tambe Minister Andin Bikker a reacciona riba e criticanan di SINBA. Un biaha mas el a menciona loke nan a hereda na momento di drenta Gobernacion. Entre otro un nivel di debe hopi halto.
Net e aña’ki mester a entrega un presupuesto cu surplus, di casi 50 miyon florin, pero a surgi e crisis di COVID-19, cu a cambia tur e aspecto financiero y e forma con ta atende cu e pais.
Prome cu esey, diferente biaha a trata di drecha e situacion. Apesar di e retonan financiero cu pais Aruba tabata confronta cu ne, a logra cumpra 2 truck, pa reemplasa 4 vehiculo bieu. E prijsnan di vehiculonan di Bombero ta hopi caro. E tabatin contacto cu Hulanda, mirando cu otro departamentonan tabata haya vehiculonan specialisa, pero no a logra pa Cuerpo di Bombero. Ultimo a tuma contacto hasta cu Merca pa mira kico tin disponibel. Banda di e material, a inverti tambe den training di personal,y a atende cu diferente otro peticion di e miembronan di e cuerpo.
Mientrastanto a lanta un taskforce pa duna Gobierno diferente conseho, y a reuni caba. E conseho ta pa con pa yega na material nobo. Inclusive si por haya algo for di Merca
“Aruba ta bibando un crisis financiero cu a hereda. E Gobierno anterior tabatin dos termino y no a percura pa reemplasa e trucknan di Cuerpo di Bombero. Y awo ta den un crisis cu ta haciendo e situacion hopi mas dificil,” Bikker a bisa.
Na final el a haci un apelacion na e directiva di SINBA pa tene poco pasenshi.
