Dia 22 di februari Minister Otmar Oduber a laga su Management Team di DIP manda un carta di menasa atrobe pa kioskeronan na Welcome Plaza. Den e carta ta menasa e kioskonan cu pa 3’or di atradi dia 26 di februari nan lo mester bandona e sitio y entrega nan kioskonan. Den un carta anterior dia 1 di februari Minister Otmar Oduber a laga menasa e kioskeronan cu dia 2 di februari lo e laga ontruim e kioskonan.
Riba e carta aki di 1 di februari cu mester ontruim dia 2 di februari of gobierno mes ta bin saca nan porta afor abogadonan Chris Lejuez y David Kock a informa Minister Otmar Oduber cu nan clientenan tin un contract valido pa huur e kioskonan y cu nan ta cumpli cu nan huur debidamente y cu Minister no por yega manda polis pa saca nan afor. E carta tabata hopi cla y hasta a bisa Minister cu ontruim un huurder sin un veredicto di Huez ta haci Minister strafbaar.
Despues di e carta aki di nan abogado na Minister kioskeronan no a tende nada mas di Minister Otmar Oduber te cu 22 di februari cu nan a ricibi un otro carta di menasa di Minister Otmar Oduber. Mientrastanto e abogadonan a bolbe informa Minister Otmar Oduber cu e no tin pia pa para riba y cu e tin cu respeta e derecho di huur di e kioskeronan. Awor ta pa mira kico lo ta e siguiente paso di Minister Otmar Oduber. Kioskeronan ta sinti nan mes hopi persigui, menasa y intimida pa Minister Otmar Oduber. Esaki ta e ultimo carta di menasa cu kioskeronan a haya.
