Durante un conferencia di prensa di Gobierno hunto cu Oficina pa Prevencion di Desaster (Bureau Rampenbestrijding) pa duna un ultimo resultado di loke ta coronavirus na Aruba.
Tur esaki a bini den cuadro di yegada awe tardi di un cantidad di personanan di descendencia Chines pero cu nacionalidad Hulandes, cu ta bolbiendo di un bishita haci na China.
Tabata presente tanto Minister di Salubridad Publico Dangui Oduber como Minister di Husticia Andin Bikker.
Minister Oduber a bisa cu a pone e team di crisis operacional y a pone tur instancia concerni na altura di e situacion, despues cu Organisacion Mundial di Salud a declara emergencia relaciona cu e plamamento di e virus aki cu a causa mas cu 300 morto caba.
E residentenan a bay pasa Aña Nobo na China y Gobierno kier a informa di e medidanan di precaucion cu ta wordo tuma. E personanan aki, e mandatario a enfatisa, no tin ningun sintoma relacion cu coronavirus.
Tambe el a menciona cu no tin ningun caso registra na Aruba, pero ta tumando tur e pasonan necesario. Hospital tin camber di separacion, den cual pone interna esnan cu sintomanan di e coronavirus y tin un espacio unda por pone pashentnan cu mester bay den cuarentena, manera ta wordo haci na tur caminda di mundo. Tur esaki pa evita cu e virus ta plama mas. “Tur partnernan den cuido ta informa di e proceduranan cu mester sigui,” e mandatario a bisa.
Tur esnan cu yega Aruba, despues di un bishita na China, lo pasa den un control preventivo, lo pasa den diferente test. E hendenan cu ta yegando awo, ta bini di un ciudad unda cu no tin casonan di coronavirus. Na mesun momento e mandatario a desmenti cu lo tin un barco crucero Aida direccion pa Aruba y cu tin hende abordo contagia cu e virus. Esaki e mandatario a bisa cu no ta berdad.
“Esaki no ta e caso. E barco crucero tabata na Aruba caba dia 25 di januari cu 3 mil pasahero. Tabatin persona cu sintoma, no di coronavirus pero di influenza.” El a mustra riba e situacion na Merca unda Influenza a mata mas cu 8 mil hende aña pasa, mientras cu e cifra di fatalidad di coronavirus ta hopi menos. P’esey e ta bisa cu no tin motibo pa panico y apesar di esey, ta tumando tur e pasonan necesario, siguiendo reglanan internacional di tur instancia di salud. “No tin motibo pa panico y Aruba ta bon prepara por si acaso surgi un caso.”
Minister Bikker, a bisa cu no Aruba no tin vuelo directo for di China. Pero a menciona cu China mes ta haci su controlnan prome cu e personanan bandona e pais. “Nos no ta anticipando cu hendenan bolbiendo Aruba despues di un vakantie ta den e grupo di riesgo. Apesar di esey, ta tuma medidanan unda cu lo haci cierto tipo di control pa e hendenan cu ta yega.”
Datonan cu ta dispone di dje ta indica cu normalmente rond di 30 persona di China ta yega Aruba pa bishita. Pero awo hopi aerolinea a limita nan vuelonan for di China. Gobierno ta evaluando kico ta bay haci riba e parti di admision. Esey ora cu e peliger ta existente. E tempo di “incubatie” di e virus ta dos siman. Ta cuminsa pa controla na entrada riba sintomanan cu e pasaheronan por tin. Pero ta haci esaki poniendo tur cos den perspectiva, pa mira si realmente ta necesario pa registra e entradanan aki.
