Un di e condicionnan cu Hulanda a pone riba Aruba ta pa corta cu 5 miyon florin den gastonan di AZV. Un condicion cu Minister di Salud Publico Dangui Oduber no ta compronde pasobra Aruba ta den pleno crisis di e pandemia di salud di Covid-19. En bes di inverti ta presiona Aruba pa baha e gastonan aki. Y esaki a sosode na Instituto Medico San Nicolas tambe.
Cu AZV mester baha su gastonan, esey Gobierno ta consciente di dje, mirando cu nan mes a haci un evaluacion y ya caba tabatin un rapport di ki adaptacionnan mester haci den AZV.
E instruccion a bini di Hulanda algun luna pasa “pa den pleno crisis, y den pleno pandemia, y den e pio situacion den historia di Aruba y mundo cu crisis di salud, pa corta 5 miyon florin pa luna den gastonan di AZV. Mientras cu na Hulanda ta duna trahadonan di cuido bonus, aki na Aruba ta duna instruccion pa corta 5 miyon florin pa luna cu tur su consecuencia.” E mandatario no ta compronde pasobra di un banda Hulanda ta bisa Aruba pa prepara pa maneha e crisis di un miho forma, y di otro banda ta obliga Aruba pa corta 5 miyon den AZV. E ta pone hopi presion riba AZV y dunadonan di cuido sin cu ningun dia Hulanda a yega na splica kico tabata e motibo pa corta den gastonan di AZV.
Aunke Gobierno di Aruba tabata consciente cu un reforma tabata necesario, principalmente restructuracion di e gastonan di AZV, y tabata trahando riba esaki. Den e evaluacion haci a mustra Gobierno kico tabata e cambionan cu mester bini. “Pero, mi no ta kere cu tabata na su luga pa den pleno crisis di Covid y den un pandemia ta hay instruccion pa corta den cuido medico. Den un pandemia no mester corta, pero inverti den cuido medico pa percura continuidad di cuido, y cu tur esnan cu tin Covid haya atencion. Pero Hulanda tin otro pensamento y esaki ta e consecuencia pa dunadonan di cuido,” e mandatario a bisa.
E consecuencia ta cu por ehempel AZV no tin e “cash flow” manera antes, como consecuencia di e pandemia. E entradanan di AZV y BAZV ta kedando atras, y cortando 5 miyon florin pa luna, ta causa of afecta continuidad di cuido. P’esey no por haci pago na tempo, manera a sosode e luna aki na IMSAN. Ya caba e instituto a manda un carta pa empleadonan cu no por paga nan manera semper dia 25 di tur luna, pero un dia prome cu e ultimo dia di luna.