E dunado di trabao pa esunnan cu ta haci limpiesa na scolnan ta e bestuur di SKOA. Gobierno no ta dunado di trabao, sino ta subsidia operacion di e scolnan y esey ta encera e limpiesa di e scolnan. SKOA ta haya subsidio pa e trahadonan di limpiesa. Esaki gobierno a cumpli cu ne y hasta a duna algo extra riba e subsidio pa e trabao di limpiesa na cada scol di SKOA.
Minister dr. Rudy Lampe ta kere cu SKOA mester cuminsa na cumpli cu e sentencia di Hues cu ainda nan no a ehecuta. Segun hues, SKOA a actua contra ley door di a tuma e trahadonan di limpiesa comosifuera nan ta ambtenaar sin un acta di nombracion, no tin decision di Conseho di Minister. ni tin Landsbesluit firma pa Gobernador, manera ta e procedura pa tur ambtenaar. Ni tampoco e salarionan tabata presupuesta.
SKOA riba su mes a pone e trahadonan di limpiesa riba payroll di gobierno comosifuera nan ta ambtenaar y a nombra nan sin tin ningun base legal, unda cu a crea expectativa falso cerca e trahadonan debi cu a priminti nan algo cu ta contra ley.
E caso aki a bay corte y na unda cu tin unn sentencia di hues cu a condena SKOA pa a actua contra ley, pero ainda SKOA no kier cumpli cu e sentencia di hues.
Minister di Enseñansa ta lamenta cu ta bruha tera comosifuera cu minister ta contra e trahado, pero ta SKOA mes a crea e problema dor di crea expectativa falso cerca e trahado.
Tampoco SKOA no tin ningun motibo pa kita pan di e trahadonan, a pone fondo disponibel pa paga trahadonan tur luna pa nan trabao di limpiesa na scolnan.
