Den parlamento minister di enseñansa, dr. Rudy Lampe a bay amplio riba e motibo cu e no a acudi na e ultimo reunion cu maestronan di Emma School. El a nenga e expresion cu e no ta scucha e maestronan. Ta e maestronan di Emma School mes lo a bisa cu nan no ta contra fusering di Emma School y Paso Pa Futuro pero cu e mester bay den fase. E mandatario a splica, cu el a dicidi di adapta su plan. “Mi a scucha y a adapta e plan den fase.”
Asina a informa nan cu e dos organisacionnan cu ta maneha cada un di e scolnan ta keda cu nan grupo, cabesante y maestronan, pero ta comparti un localidad. Algo manera cu a haci na JFK Center. E bentaha ta cu lo comparti cierto servicionan. Por ehempel awo entre e dos scolnan tin un logopedista, un concierge, un trahado administrativo, pero tambe tin escasez di asistentenan di klas y di studiante; maestro specialisa, etc. Tur e trabounan aki por wordo comparti.
Tambe lo pone klasnan modular pa crea espacio pa e profesionalnan por atende cu cada alumno di e miho forma. “Mi a cambia mi plan di fusering y a adapt’e, pero den prensa mi ta lesa cu esaki tampoco ta bon,” e mandatario a informa parlamento.
Kier reuni sin prensa y sin protesta
A base di tur loke tabata pasando cu e tema di fusering, el a yama un reunion cu maestronan di Emma School pa diahuebs siman pasa. Minister Lampe a informa parlamento cu den reunion di Conseho di Minister unda a trata e tema di Emma School a papia ampliamente riba e miho forma pa atende cu e situacion aki.
Asina a bini dilanti e proposicion pa director interino di DPS (Directie Publieke Scholen), atende e reunion. E motibo ta cu e tabata un maestro na Paso Pa Futuro. “El a traha tres aña den enseñansa special y sa kico ta come y bebe den enseñansa special. Di e forma aki e por facilita e dialogo riba e tema di fusering. Esey ta e unico motibo cu mi mes no a atende e reunion. E tabata pa crea un miho dialogo riba e tema”.
Sinembargo na momento cu den oranan di mainta a tuma nota cu prensa lo ta presente pero tambe lo tin protesta, a dicidi di haci otro cambio. A bisa e cabesante pa e reunion por tuma luga den tur trankilidad na oficina di DPS. “E unico cos cu mi a bis’e ta: ora bo caba di cera scol bay JFK Center”.
“Mi no a duna ordo pa cera e scol na candal. E reunion tabata planea pa 1.30 pm, ora cu tur maestro ta bay cas, manera nan a mes a informa mi cu 1.30 pm scol ta cera”, asina e mandatario a finalisa su relato pa prensa.
