Su presencia durante e acto protocolario awe mainta riba Plaza Betico Croes a hala atencion y a haci falta. Por a imagina cu algo mester a sosode cu e no a atende e ceremonia dedica na su tata. Ta resulta cu Minister Glenbert Croes ta na cas obligatorio den cuarentena. Si tur cos ta bon, diaranson awor Departamento di Salubridad Publico lo permiti e sali di cuarentena y cu e por sali atrobe pa bay traha.
Sinembargo, e yiu muhe chikito di e mandatario, di 15 aña, a represent’e dignamente durante e evento aki, esta Thiara Gabriela (Tati) Croes. E ta masha orguyoso di su welo y como tal a representa su tata debidamente, den compania di su omo Gilberto “Junior” Croes y su tantanan Gisette Croes y Glendeline “Lalo” Croes.
Minister Croes no ta e unico minister den cuarentena, pasobra Minister mr. Andin Bikker tambe tin e mesun problema aki, esta e tambe ta den cuarentena na cas pa algun dia caba. E regla cu DVG ta hiba ta masha estricto y ta indica cu asina un persona tabatin contacto di cerca cu un otro persona cu ta positivo, cu mester bay dos siman den cuarentena.
