Tabata tin un tempo cu algun incentivo na San Nicolas tabata yuda reduci grondbelasting, a stop cu esaki. Den Caya Betico Croes, ta algo cu kisas lo por haci pasobra tin cierto proyecto para – kisas cu incentivo fiscal ta manera pa gobierno yuda den e parti aki. Nos a puntra mr. Geoffrey Wever, Minister di Asuntonan Economico si gobierno ta pensando den e area aki.
E mandatario ta splica cu nan ta explorando esaki y pa basta tempo e proposicion a keda entrega na Departamento di Impuesto (DIMP) pa revision. Awor sector comercial a bini cu su recomendacion, manda pa DIMP pa mira kico por implementa na corto plaso. E ta algo cu ta den preparacion pero mester corda cu na final di dia inversionista priva mester haci nan inversionnan.
E motibo pa kico tambe na Hulanda a ilustra kico t’e posibilidadnan pa purba na pusha anto incentiva comerciantenan tambe pa inverti. Tin doñonan di edificio cu tin bon fondo cu mester por, pero kisas ta mira e ‘Return of Investment’ of otro area cu ta prefera inverti.
“E ta keda un reto entre nos empeñonan y sperando cu sector priva dicidi di haci su inversionnan.” Algun siman despues di e Aruba Investment Summit, nos a puntra e minister si ja caba tin un idea cuanto inversionista a logra atrae pa nos isla. E ta conta cu nan a topa cu diferente persona interesa den Aruba, a intercambia informacion y tin diferente combersacionnan andando cu inversionistanan cu a atende e seminario aki. “Den e simannan nos dilanti nos lo continua cu combersacion cu nan y wak con por yuda pa al concreto sali di esey sigur sigur.”
