Tanto mas cooperacion y mas intercambio di informacion como crea e plataforma pa posibilidad mobilidad academico y profesional dentro di Reino Hulandes, tabata e peticionnan presenta na e Minister di Educacion, Cultura y Ciencia di Hulanda, dr. Robbert Dijkgraaf durante su reciente bishita na universidad di Aruba.
Minister di Educacion y Deporte, Endy Croes, y miembro di Colegio di Supervision di universidad, Angelo Brete, a yama Minister Dijkgraaf bonbini. Rector di Universidad di Aruba, prof. dr. Viola Heutger a duna un tour rond di e edificio y a yama e dignatario oficialmente bonbini durante e presentacion den aula. Dr. Heuger a bisa den su speech cu hopi no sa cu investigacion na Aruba ta data for di siglo diesshete (17) cu e estudio di colibri. Notando e importancia di e estudio colaborativo aki den cua a keda determina cu Aruba tabata cas pa e especie mas chikito di colibri, dr. Heutger a enfatisa e balor di investigacion pa desaroyo di universidad, su academico-, studiantenan y comunidad di Aruba den su totalidad. Pa investigacion florece sin embargo, colaboracion ta esencial manera tabata e caso den e estudio di colibri.
mr. Dr. Ruth Bonnevalle-Kok, decano di Facultad di Ley, a guia presentacion di e decanonan riba e status di nan facultad-, inscripcion-, exito- y retonan. E programa acredita di Facultad di Ley ta produci hopi storia di exito y oportunidad. Sinembargo, e graduadonan ainda no tin acceso na e asina a yama ‘Civil Effect’, pa por forma parti di e Colegio di Abogado di Hulanda, e organisacion profesional di abogado, es decir no tin e posibilidad pa traha den cierto tereno legal na Hulanda. Minister Dijkgraaf a aborda e inkietud aki y a bisa cu e proceso ta andando y unabes e ta adapta, lo nifica mas mobilidad dentro di Reinado pa e Masternan di ley Rubiano.
mr. Paul Vandormael di Facultad di Economia y Finansa, FEF, a ilustra e balor di e facultad no solamente den comunidad di Aruba, pero tambe pa e continuo desaroyo di e graduadonan, tanto na Hulanda como na otro parti. Cu e actual esfuersonan pa recupera acreditacion, FEF y Aruba lo beneficia mas cu intercambio di programa y material di estudio cu universidadnan Hulandes y reconocimento di e diplomanan.
Facultad di Estudio di Hospitalidad, Turismo Manaho, FHTMS, tambe ta satisface demanda di un sector di turismo robusto. Decano Sue-Ann Lee a indica cu e acreditacion Mericano y colaboracion cu University di South Carolina ta demostra e caracter hibrido di e institucion. El a enfoca tambe riba e capacidad (financiero limita) na Aruba pa haci investigacion continuo, particularmente pasobra turismo por duna un cantidad grandi di informacion riba un escala global.
Mientras graduadonan di Universidad di Aruba ta termina cu carera, tanto na Aruba como den exterior, e oportunidad di amplia nan capacidad intelectual ta parti di e mobilidad di Reino.
Decano di facultad di Ciencia dr. Mieke Droog, a subraya e necesidad di un programa pa financia y facilita entre otro e oportunidad p’e studiantenan Rubiano participa na intercambio di programa academico.
Oficina di Asuntonan Internacional a mustra riba e impacto positivo di e programanan di intercambio existente, door di entre otro e Erasmus+ programa y e minister a ricibi testimonio di participantenan na e Academic Foundation Year cu su crecemento continuo, cu ta posibilidad e graduadonan di scol secundario pa ta miho prepara y informa prome cu nan continua cu nan educacion avansa.
Na final di e presentacion, Minister Dijkgraaf a expresa su compromiso pa cumpli cu e peticionnan y a sigura cu ya e pasonan ta wordo tuma pa hisa colaboracion y mobilidad dentro di Reinado. Dijkgraaf a splica tambe e intencion di Gobierno Hulandes pa pidi disculpa pa nan participacion na sclavitud na e islanan Caribe y con e reparacionnan proponi ta dirigi riba mehora comprension y conocemento.
