E ta un ciudadano preocupa, e tin como nuebe aña na Aruba, apart di un inversionista, recientemente hasta el a bira un residente di nos pais. Inessa Hansen ta su nomber, e ta biba na San Fuego y e ta sumamente desapunta den e maneho di e gobierno actual.
Nan tin aña ta pidi pa asfalt y no ta ricibi nada. Hansen ta sinti cu San Fuego ta un bario lubida p’e gobierno actual. E ta cuestiona cu; e ta paga asina hopi placa na impuesto y no ta mira unda e placa ta bay. E ta normal cu ta gobierno su deber pa drecha caminda na Aruba, pero e ultimo añanan aki no a mira esey.
Hansen ta pidi gobierno un biaha mas pa uza su placa di impuesto pa drecha e caminda na San Fuego. Hasta e ta boga pa gobierno “step up” y cuminsa traha. Nan a mand’e di cashi pa muraya. A bay DOW, a bis’e cu lo soluciona e problema pero te awe nada. Na DIP ta mesun storia, a yega asina leu cu ey un funcionario a conseh’e pa acerca 24ora.com p’asina yud’e yega na un solucion.
Hansen tin pagina riba Facebook cu miles di siguido, cual mayoria ta turista cu ta bishita nos isla. Ey y hasta personalmente, e turistanan ta comenta cu e camindanan na Aruba ta na werki. Locual mas ta sorprende Hansen ta ora el a mira cu parlamento a aproba mas di 300 mil florin pa asfalta un parti di Santa Cruz, dilanti Bestuurskantoor cu Parlamento y algun caminda mas.
E ta cuestiona cu e camindanan cu a aproba fondo pa nan drecha no ta necesario pa drecha, mientras cu San Fuego ta come stof tur dia. Su palabra final: “Uza placa di impuesto pa drecha caminda cu di berdad mester y no pa voto so.”
