Den parti final di su entrevista durante e noticiero meridiano Enfoke, minister di economia mr. Geoffrey Wever a duna su perspectiva pa e futuro economico di nos isla. Di un banda e ta enfoca riba e aspectonan positivo manera e nivel record di likides den banca local.
Esaki por financia un proyecto cu lo evita cu Aruba ta bolbe cay den e situacion aki door di su dependencia stranhero. Pero di otro banda, tambe e mandatario a señala cu mester duna e giro total na e manera con ta goberna si kier evita pa pasa door di un scenario ainda pio cu esun actual.
“Mi ta kere mester cambia e ‘narrative’ pa wak mas positivo riba termino largo,” e minister a cuminsa na bisa pa elabora cu, por ehempel, nos turismo a recupera miho di loke a spera, maske su spin off ta bay tuma mas tempo. Ta danki na esey cu, ya caba pa proximo aña, Aruba lo a recupera nominalmente compara cu 2019.
Adicionalmente, aworaki tin un ‘overliquiditeit’ na Aruba. Finanzas di gobierno ta den la situacion, pero den banconan di Aruba tin hopi placa. Pa prome biaha den historia, a yega e cifra di 1.3 biyon florin. “Loke mester crea awor ta oportunidadnan di inversion,” Wever a comenta puntrando unda ta bay inverti e placa ey. Pa su persona, mester ta un proyecto cu ta impacta e economia positivamente.
