Minister encarga cu salubridad publico, Dangui Oduber tabata na Imsan. El a splica cu el a tene un reunion di orientacion cu director di Imsan, dr. Joel Rajnherc, pa sa kico ta e plan, e vision, kico Imsan ta bezig cun’e. E minister a wordo informa cu diamars, tin un dia di informacion y un rondleiding di tur compania cu a wordo invita pa bid den e bidding process pa renobacion, ampliacion di Imsan. Un inversion di 61 miyon florin. Tabata un destaho publico, transparente y awe, tur compania cu a mustra interes a bin haya presentacion, kico por spera di Imsan, unda nan kier bay, kico tur ta wordo haci pa no haya sorpresanan desagradabel pa tur compania presente cu ta interesa pa ehecuta e proyecto aki, cana door di e edificio di Imsan, wak e camindanan cu tin mester di un renobacion/ampliacion, pa despues cu mañan bo no hayabo cu discusionnan cu contratista cu no tabata sa cu lo a spera di e parti aki cu e mester a wordo remodela di tal manera.
Ta importante na un manera transparente, tur e contratistanan ta na altura kico ta e verwachtingspatroon di Imsan. Kico ta e exigencianan cu nan mester cumpli cun’e pa mañan tur hende ta bon na altura di esaki.
Pa e minister tabata importante pa haci un bishita, conoce tur e contratistanan. As a matter of fact, tabata un bidding process cu a invita companianan internacional y local.
Tin di compronde for di e director di Imsan, cu ta companianan local so ta participa na e bidding process. E proyecto mes mester cuminsa otro aña na Mei 2018. Ta un proyecto sumamente interesante. No solamente ta bay upgrade nos cuido medico. Ta bay brinda un miho servicio, pero tambe ta bay crea cuponan di trabao cu ta importante pa nos economia. Minister Oduber ta kere den e vision di Imsan. Poco poco ta bayendo den e direccion caminda cu e vision di Gobierno ta pa converti Imsan den un hospital completo, pero tin cu haci’e paso pa paso. E paso awor aki ta renobacion, ampliacion, cumpra ekiponan nobo, pa por brinda e miho calidad y servicio. Como minister di salubridad, esey ta loke ta boga pe, cu despues di e periodo di gobernacion, e pueblo ta nota e diferencia y e cambio y bisa cu di berdad e cuido medico a conoce un mehoracion.
E soño di Imsan
Ya caba cu tin Imsan, ta yuda baha e peso cu tin riba hospital awor aki. Tin un proyecto di renobacion, ampliacion di dr. Horacio Oduber, pero ta importante, mirando e cantidad di persona cu ta bibando riba nos isla, pa toch tin dos caminda cu por brinda e servicio, e cuido medico di mas halto. Pesey ta kere den e vision di Imsan, pasobra na e momentonan aki, Aruba ta conta cu mas di 120 mil habitante caba. Den bista di Gobierno 1 hospital lo ta suficiente pa cubri cu e demanda cu tin na e momentonan aki, pa loke ta trata cuido medico, SEH, salanan di operacion. Imsan ta fit perfectamente den e vision di e gobierno aki, pa asina por tin mas facilidad cu por brinda e servicionan aki. Pesey ta kere den e vision aki. E ta importante pa e inversion aki tuma luga. E tabata un proceso largo cu nan tabata bezig cun’e, den colaboracion di Baptis Hospital. Tin di compronde cu tin un colaboracion hopi estrecho cu ta importante pa mantene e colaboracion aki, pasobra nan ta brinda e experticio y conocemento aki tambe na Aruba.
Rol di Gobierno y AZV
Esaki ta un cooperacion entre Imsan, AZV, Horacio Oduber. E intencion ta pa traha di cerca cu otro pa e comunidad sinti cu cuido medico tin prioridad pa e Gobierno aki y kier eleva e calidad di cuido. Kier reduci wachtijden, kier recorta e liñanan pa tur hende por nota cu tin un cambio den salubridad publico. Cu tin un cambio pa miho. Esey ta e meta cu a pone como minister di salubridad, pa tur hende sinti cu tin atencion, tin prioridad. Salubridad ta trata bida di hende. Ta algo delicado y ta pesey tin nos profesionalnan na nan luga. E intencion ta pa traha di cerca cu tur e profesionalnan aki y haci uzo di nan conocemento y nan experticio pa guianan den e maneho di salubridad.
Dr. Vallejo
A tene un combersacion cu dr. Vallejo y den curso den e dianan aki e lo pasa cerca e minister pa planta e simia y cuminsa cu e trabaonan pa e tambe comparti su vision, unda mester hiba salubridad publico y esey ta e intencion. Dentro di aki poco dia esaki lo wordo concretisa y formalisa.
