Diahuebs den ora di mainta a firma un acuerdo di cooperacion (MOU) entre Ministerio di Turismo y Salud Publico, HOH, ImSan y AZV. Minister Oduber a señala cu ta pa prome biaha den historia e instituto di HOH y ImSan ta bay traha hunto intensivamente.
E MOU aki lo bay yuda na mehora e servicio y e calidad di cuido na Aruba, banda di esaki e MOU aki ta haci cu Aruba ta cumpli cu e Landspakket poni pa Hulanda. Cu e acuerdo firma aki HOH y ImSan ta bay traha hunto na un manera mas eficiente pa duna un miho cuido na nos comunidad y pa mantene nos fondo di AZV sostenibel.
E firmantenan di e MOU importante y historico aki tabata Minister di Turismo y Salud Publico D.P. Oduber, B.Ec – E presidente di Raad van Bestuur HOH, drs. J.E.M. Vroegop – E director ImSan, drs. J.R. Rajnherc, kinderarts y e director AZV, ir. E.M. Jacobs.
E mandatario a trece dilanti cu e ta contento di e profesionalismo y calidad di cuido cu HOH y ImSan ta duna na nos comunidad. Awo cu e acuerdo di cooperacion aki esaki ta bay mehora ainda mas. Pa locual ta nos seguro medico general (AZV), esaki Aruba mester ta orguyoso di dje mirando cu nos ta un di e poco paisnan na mundo cu tin un seguro asina extensivo. Hopi pais grandi y avansa no tin un seguro general manera esun di AZV, e mandatario ta remarca.
Minister Oduber a papia tambe riba e retonan cu tin den Salud Publico, Aruba no tin e comunidad di mas saludabel. Tin hopi asegurado cu ta sufri di malesa cronico. Nos tin “dubbele vergrijzing” y tambe ta existi e presion cu Hulanda a impone pa corta presupuesto di AZV cu ta den e Landspakket.
Minister Oduber a splica cu na januari di 2021 a duna e tarea pa haci un investigacion riba eficiencia, efectividad y financiamento di cuido na Aruba na profesor Hubben y profesor Batenburg. Na januari di 2021 a institui tambe un comision nacional di cuido cu a haya como tarea pa trece diferente recomendacionnan dilanti di con nan ta pensa cu nos por yega na e recorte di 60 miyon florin den cuido. A crea un Roadmap con y unda ta bay haci e reformanan necesario pa garantiza cu AZV ta keda sostenibel.
