Incidente y accidente ta pasa ora menos nos ta spera. P’esey ta importante pa nos semper ta prepara. Un parti primordial di e preparacion pa un calamidad ta encera e conocemento di e pasonan cu ta tuma lugar den un caso di emergencia. Muchanan ta den un etapa vulnerabel y tin mester di nos proteccion. Fundacion Pa Nos Muchanan un bes mas a organisa su curso di prome asistencia y seguridad. E curso consistiendo di tres sesion a conta cu 13 participante cu a completa esaki exitosamente.
E curso tawata un colaboracion di diferente organisacion. Participantenan a siña e teoria y practica di prome asistencia y CPR hunto cu American Safety and Health Institute. Brandweer Aruba a siña e participantenan tocante seguridad di candela y Directie Volksgezondheid a siña e participantenan tocante seguridad di baby ora di drumi. Sin laga’fo, Fundacion Pa Nos Muchanan a siña e participantenan tocante seguridad pa paden y pafo di cas.
E participantenan a haya e oportunidad di comparti nan experiencia y conocemento cu otro. Alabes pa puntra e profesionalnan tocante nan experticio. Despues di e tres sesionnan, e participantenan a ricibi nan certificado y carnet di EHBO.
Preveni ta mihor cu lamenta. Si abo ta un mayor, famia of un dunado di cuido di mucha y ta desea di participa den nos curso di prome asistencia y seguridad, of un di e otro cursonan cu nos fundacion ta ofrece, sigui nos riba Facebook pa keda informa.
