Despues di accion di malcontento di trahadonan di Jeugd Gezondheidszorg, dia 15 di augustus Minister di Salubridad Publico Dangui Oduber a manda un contesta riba e Manifiesto cu e empleadonan a entrega na su persona.
Un biaha mas e ta pidi pa nan comprension y pasenshi pasobra e edificio ta keda cla te aki un luna. Den e carta por lesa cu e ta bisa cu e ta consciente di tur e preocupacionnan di e trahadonan di JGZ y a recorda nan riba loke a papia den un reunion di dia 5 di juli, durante cual delegadonan di sindicato TOPA tambe tabata presente.
Eyden a bisa cu Gobierno a scoge pa huur un edificio cu mester caba di wordo
drecha. E Ministernan ta bisa tambe cu e tardansa, segun el a averigua, ta di 3 pa 4 siman.
Pero tambe ta splica e trahadonan cu a scoge pa e edificio aki despues di un evaluacion, unda a tene cuenta cu por ehempel cuanto e lo costa Gobierno. Den e evaluacion a tene cuenta cu esaki ta sali Gobierno hopi menos costoso en comparacion cu e edificio proponi door di JGZ. “Esaki a pisa mas den e decision tuma,” el a bisa den su carta na e empleadonan. Mientrastanto a chek cu doño di e edificio en cuestion, kende a garantisa cu den 3 pa 4 siman tur e trahadonan di JGZ por wordo aloca den e edificio aki.
“E ta espacioso y adecuado, pero tambe ta cumpli cu tur e exigencianan pa un bon ambiente di trabou,” e mandatario a bisa. Na mesun momento e ta bisa di no ta compronde pakico mester perhudica baby y muchanan cu mester wordo vacuna, y tambe e control cu mester tuma luga na scolnan. El a bisa esaki pa motibo cu e empleadonan a menciona cu si nan no cuminsa ehecuta nan trabounan pa fin di september, e vacunanan cu tin aworaki, balora na rond 36 mil florin, ta caduca. Na final, e ta pidi comprension y pasenshi di tur e empleadonan di JGZ.
