Menasa cu machete na Seroe Blanco

Diabierna mainta alarma ta cantidad a bay direccion di Seroe Blanco, unda supuestamente tabatin un caso di kapmento.

Pero na yegada a bin tende cu tabata trata solamente di un menasa. E hecho a sosode riba un pida tereno cu ta pertenece na un ciudadano Chines. E doño aki ta huur un pida patras cu un otro persona.

Segun por a compronde, pa algun dia caba tin un problema andando entre trahadonan di doño di e tereno y e huurdo, unda cu coriente ta cay afo, pa cual ta wordo pensa cu esaki ta sosode intencionalmente. A surgi discusion, cu menasa cu ta bay saca machete y finalmente el a sosode diabierna mainta.  E Polisnan cu a yega rapidamente na e sitio, a detene esun cu tabata cu e arma blanco mientras cu esun cu a wordo menasa, a dicidi di bay entrega keho.