Frisian Flag, hunto cu Compra, ta organisando diadomingo awo nan prome caminata. E ta un 5K walk and run y tambe tin Kid’s Racers den cuater categoria di mucha di 4 pa 13 aña.
E caminata aki tin’e pa yuda promove bida saludabel, movecion, canamento, coremento. Preferibel cu henter e famia. E lema di e slogan di Frisian Flag pa e aña aki ta “Building Strong Families”. No solamente a scoge un 5K pa adulto, pero diferente categoria pa e muchanan tambe por participa den e caminata aki.
A habri e website www.runbacktoschool.com, unda cu ainda por inscribi pa participa den e caminata. Pa registra y finalisa e registracion, tin cu pasa na Ibisa situa den Frankrijkstraat prome cu 4’or di atardi.
Pa participa na e 5K Frisian Flag Walk and Run, ta 25 florin pa adulto (14 aña bay ariba) y pa mucha ta 15 florin. Manera ya indica, tin cuater categoria di mucha, y ta sali den diferente heat, esta no tur hunto. Esey ta cuminsa pa 7’or di mainta. E adultonan ta sali pa 6’or di mainta y ora nan ta drenta bek, ta cuminsa cu e Kid’s Racers.
A haya un hopi bon respons vooral di e muchanan. A haya en realidad hopi mas mucha pa participa compara cu e adultonan, mirando cu e vakantie a caba di caba. Asina ta mira cu kier haci’e sigur un biaha mas, pero habri pa mas mucha por participa. Ta mira cu e ta basta popular entre e muchanan y nan kier participa. E distancianan ta mas chikito pa e muchanan compara pa e adultonan.
Tur e muchanan cu ta participa, ora cu nan pasa e liña final, nan ta bay haya nan finishing bel. A dicidi di cumpra un medaya a bin cu un campana di baca di Frisian Flag. Nan ta bay cas tambe cu un bunita goodie bag.
A habri e caminata pa 500 adulto y 200 mucha. Pa loke ta muchanan ta yen caba y djis pasa paga na Ibisa. Pa loke ta e cuponan di adulto, falta algun cupo mas, caminda cu por inscribi tanto awe como mañan pa no keda afo.
Tur participante ta sali cu nan bib y chip. Esun cu ta bezig cu ta core pa nan ranking, e caminata aki ta inclui den esey, tanto pa mucha como adulto. Tin hende cu ta core pa esey y mira si nan ta subi di nan categoria, etc.
Tambe ta bay tin un evento familiar, cu manera cu e careda sali pa 6’or, ta habri riba Plaza Betico Croes, cual ta e start y finish, unda cu Compra completo ta bin cu e marcanan faborito, cu tasting.
Evento familiar
En conexion cu e caminata diadomingo, Compra a pensa pa por colabora cu Frisian Flag, como e ta un evento specialmente pa full e famia. Nan tin hopi mas marca conoci den hopi cas na Aruba, cu tin hopi sentimento pa e famia y asina a pensa riba un evento diadomingo, pa haci’e mas dibertido pa tur famia na Aruba.
E evento ta bay ta habri pa full e publico, te cu 10’or di mainta. Ta bay tin varios stand cu tin hopi marca conoci manera Kraft, tin Pringles pa parti, tin Avelina Oatmeal. Ta bay tin varios breakfast item pa por parti pa e publico e dia. E muchanan ta bay pasa dushi, pasobra cada tent ta bay tin diferente wega pa e muchanan por gosa di dje.
Tambe ta bay tin e famoso Dino Jump di Frisian Flag. E ta bay ta un dia yena cu dibersion. Manera cu e caminata cuminsa, practicamente ta habri e plenchi di Plaza Betico Croes, pa asina e famianan por cuminsa gosa di full e evento. Corda, cu ta bay tin hopi muestra e dia ey fuera di e caminata mes.
