Durante di su bishita na Berlin, Minister Plenipotenciario Guillfred Besaril tabata tin un encuentro cu Willemijn van Haaften, embahadora suplente di e embahada di Reino na Berlin.
Durante un combersacion ameno, Minister Besaril a papia cu sra. Van Haaften riba e ultimo desaroyonan riba e terenonan di innovacion, economia circular y industrial. Ademas a toca e tema di refineria na Aruba. Minister Besaril a informa sra. van Haaften cu Gobierno di Aruba ta den negosacion cu Citgo pa haya e refineria bek. Una bez cu e aspecto aki keda concretisa lo por tuma un decision si ta busca un otro operador pa e refineria. Pa cu esaki, Gobierno di Aruba ta en busca di empresanan cu por comberti e refineria den uno sostenibel y cu ta tene cuenta cu Aruba su medio ambiente. Riba e tereno ey, segun Minister Besaril, Aruba ta wak den e direccion di Alemania, cu tin hopi experencia riba technologia innovativo y sostenibel.
Minister Besaril a sigi elabora cu Aruba ta sigui sondea posibilidad riba e tereno di energia sostenibel y economia circular. Esakinan tambe ta terenonan den cual Alemania definitivamente ta un “Power House”. Sra. Van Haaften a bisa Minister Besaril cu embahada di Reino na Berlin ta dispone di hopi contacto cu comercio y industria Aleman y cu sigur nan ta na disposicion di Gobierno di Aruba pa logra drenta den contacto cu personanan clave riba e terenonan aki na momento cu Aruba indica esaki.
Otro topico cu Minister Besaril a papia cu Van Haaften, ta e deseo di Aruba pa bin cu mas diversidad den e embahadanan di Reino. Minister Besaril ta di opinion cu e presencia di diplomaticonan for di Aruba of e otro Paisnan den Reino, manera Curaçao of Sint Maarten na embahadanan di Reino den Caribe y Latino America, tin su balor agrega na e cuerpo diplomatico di Reino. “Nos hendenan por papia e idioma y compronde aspectonan cultural di e paisnan aki cu sigur por sirbi na estrecha aun mas e lasonan diplomatico y comercial di Reino Hulandes den e region. Alabes esaki ta accentua e diversidad di Reino Hulandes”, Minister Plenipotenciario Guillfred Besaril a indica sra. Willemijn van Haaften, embahadora suplente na embahada di Reino na Berlin.
