Diahuebs 25 di april Minister Ursell Arends a atende e “Sustainable Education Symposium”, cual e tema di e aña aki tabata “Ban Planta!”. Un evento sumamente interesante elaborando ariba e importancia di fomenta un Aruba mas autosuficiente.
Durante e evento varios orador a hiba palabra, incluyendo Astrid Britten, directora di Biblioteca Nacional, Rendell de Kort di Cornerstone Economics, Roselinde Barros di Living Soil Agro Consultancy y Gregory Fung-A-Fat di United Farmers. Cada uno a enfoca ariba diferente aspecto di plantamento, entre otro, sosten comunitario, cuminda local como parti di nos cultura, impacto ambiental y mucho mas. Hunto cu Santa Rosa a organisa algun charla di “Sustainable Education Symposium” den siman pa asina e studiantenan tambe siña tocante sector primario na Aruba.
Aruba ta dependiente di importacion, cu ta haci nos isla vulnerabel na fluctuacion economico rond mundo. E tema di “Ban Planta” no ta solamente tocante agricultura, pero ta representa un compromiso mas amplio pa aumenta resiliencia y siguridad di alimentacion di nos pais contra cambio climatico y incertidumbre economico.
“Cada simia planta ta un paso pa sigura nos futuro”, Minister Arends a remarca, notando e importancia di combina sabiduria ancestral cu tecnologia moderno pa forma un caminda sostenibel pa Aruba.
Ministerio di Naturalesa ta felicita e ekipo di Biblioteca Nacional, Santa Rosa y tur e participantenan di e simposio pa nan contribucion den fomenta un cultura di agricultura sostenibel.
