Abogado Lincoln “Dello” Gomez a reacciona riba e ley di Instelling Ministeries cu ta defini e ministerionan. El a splica cu mester cambia e LIM pa ministernan tin un base legal pa por tuma decision y actua. Minister di Husticia, Andin Bikker, no a bay mucho den profundo den locual su amigo/socio a bisa den fin di siman.
P’e mandatario, e abogado tabata referi riba e Landsverordening Instelling Ministeries, pero e sistema Parlamentario ta basa riba vertrouwensregel. Esey ta e principio, pero di a pone acerca e Landsverordening Instelling Ministeries (LIM), Bikker ta di pensamento cu Gomez a lubida cu esey ta un ley.
Esun cu ta traha y propone ley ta Ministerraad. Segun Bikker, si Ministerraad ta tuma un decision unda cu ta bisa un minister di ta cambia e ley cu trata e constelacion di ministerio, e Ministerraad tin e derecho ey. El a bisa cu diferente persona, ex minister, ex politico a bin dilanti y splica corectamente riba e vertrouwensregel.
Na momento cu un of mas Parlamentario cu ta sostene un gabinete y kita nan sosten for di un minister, e tin di bay y por a mira cu esey a pasa siman pasa na Corsou. E ta di pensamento cu esey mester ta e enfoke. Bikker a sigui bisa cu e enfoke mester ta si ta posibel di tin un minister independiente den constelacion Parlamentario cu no tin sosten di un of mas miembro di e coalicion como Parlamentario. E conclucion di esaki ta cu e no ta existi. Esey ta e pregunta huridico cu tin di contesta y den su concepto tur caminda por diferencia di opinion. E unico instituto cu por trece un clarificacion di e impasse aki ta Parlamento.
