Gang di Arte a pasa den un trayecto caminda ta duna un plataforma na hobennan pa por profila nan talento. A haci e proyecto aki na diferente ocasion den combinacion cu otro proyectonan manera entre otro “Manic Monday” den Cas di Cultura.
E aña aki, igual cu aña pasa den combinacion cu proyecto “Dream Dare Do”, a nota cu e proyectonan tin metanan den comun y a uni forsa. Den e caso aki e unico diferencia cu e hobennan tin cu multiplica nan talento pa forma parti di e competencia.
John Freddy Montoya, Lider di seccion di implementacion di Departamento di Cultura Aruba a conta cu aunke e aña aki tabata excepcional, nan a haci tur nan esfuerso di ta creativo mirando cu a permiti unicamente 16 persona riba escenario. Esaki no a stroba creatividad. Por aprecia e resultado di un siman di tayer.
Hobennan di Popcorn Dancers a prepara durante cinco siman a base di formacion personal y di lider y e hobennan mes a multiplica nan experiencia y conocemento pa cu otro hobennan.
Por a aprecia aproximadamente 100 mucha cu nunca antes a subi un escenario y den e proyecto aki lo tin chens di continua y sigui profila den e mundo di arte.
Ta manda un danki di curason na Departamento di Cultura den colaboracion cu Popcorn Dancers y cu sosten di UNOCA, pero tambe cu apoyo di sponsors cu a uni forsa y laga e hobennan aki expresa den forma di arte. Pabien na e hobennan, na e mayornan, na e lidernan cu a brinda e oportunidad y asina prepara na caminda pa nan di 15 aniversario den Gang di Arte.
Tambe a haya oportunidad di combersa cu Juan Perez cu ta forma parti di Gang di Arte y ta fungi como instructor pa mas 3 aña consecutivo. Ta conta cu e aña aki a bay diferente y a introduci 14 intructor nobo.
Perez ta conta cu e ta un Popcorn Soldier y a ricibi varios peticion di miembronan di Popcorn pa bira lider den e proyecto pa asina nan tambe duna nan aporte. A tuma varios curso prome pa asina prepara pa e reto. A tuma nota tambe di hopi participante nobo, interes tabata grandi y na final a conta cu 105 participante. Un experiencia leuk cu diferente tayer, wega, actividad den bus, un experiencia maraviyoso. Sigur un invitacion y recomendacion pa otro aña pa participa y forma parti di e Gang di Arte.
