“Tur dia tin algo historico ta pasa. Awe mi a firma Presupuesto 2023 pa esaki por cana su caminda y yega 1 di september 2022 na Parlamento di Aruba. Historico, pasobra despues di 15 aña nos por entrega un presupuesto conforme ley na tempo na Parlamento”, asina Minister di Finansa y Cultura, mr. Xiomara Maduro, a anuncia.
“Mi tata defunto lo a bisa ‘In de naam van de Vader, de Zoon en de Heilige Geest, Amen.’ Cu gratitud inmenso na tur cu a traha duro pa haci esaki posibel, specialmente e team di Departamento di Finansa y Departamento di Legislacion.”
Presupuesto 2023 a bay gobernador y gobierno ta ward’e yega bek pa entreg’e diahuebs dia 1 di september 2022 na Parlamento.
Cu e proceso ey por cana den un dia, no ta conoci. Cuanto lo reduci y ki medida lo incorpora den e presupuesto aki, tampoco e mandatario a anuncia. Specialmente CAft y Gobierno di Hulanda lo ta vigilante pa sa cuanto lo corta den presupuesto. Si tur cos ta bon, CAft lo desea pa tin un surplus otro aña, pues mas entrada cu gasto. Cua recomendacion di CAft a inclui den e presupuesto 2023, ainda ta un misterio.
