John Fun di Fundacion Ban Uni Man Pa Cria Nos Muchanan, un fundacion cu pa hopi aña ta percura pa desayuno na scol pa muchanan den necesidad. E servicio aki ta hopi importante den comunidad, y a sa di yuda centenares di mucha na scol. Pa varios aña caba tin contacto cu e fundacion y tempo cu Minister di Enseñansa, Michelle Hooyboer-Winklaar tabatin e cartera di Asuntonan Social, ya caba a existi un contacto estrecho pa asina monitorea e situacion di e fundacion y dato di nan trabou.
Pa hopi aña e fundacion a vocifera cu nan ta ricibiendo suficiente donacion for di comunidad, sea ta donacionnan individual of for di companianan.
Na momento Minister Hooyboer-Winklaar a tuma over e responsabilidad di enseñansa el a keda cu e pensamento cu un fundacion asina aki ta haci un trabou no solamente cu e meta social pero tambe di enseñansa. Si muchanan no por concentra pa motibo cu nan no tin e nutricion cu nan mester y merece, esey sigur lo tin efecto riba e resultadonan academico. Semper a papia riba e aspectonan aki, kico por haci pa asina por crea e ambiente ta mas pro activo pa yuda studiantenan ta mas exitoso.
Asina aki a cuminsa cu e pasonan pa mira con por yega na fondonan pa asisti e fundacion, y asina sigura cu nan ta para solido y por sigui duna nan servicio na scolnan. Asina aki a planea pa reserva fondonan for di “onderwijs fonds”, fondonan ricibi for di Union Europeo. Ministerio di Enseñansa a planea cu na momento cu ricibi e di tres tramite di fondo, lo aloca cierto fondo pe fundacion aki.
Na luna di juni ultimo Onderwijsfonds 2017 a wordo aproba den Parlamento y asina ey a yega na e fondonan necesario pa brinda e fundacion, cu a pasa e diferente pasonan pa por ricibi e fondonan awor. A brinda nan un suma di proyecto cual no ta un subsidio anual.“Nos ta hopi contento di a yega y finalisa e suma di Afl 100,000 pa e fundacion importante ki”, asina Minister Hooyboer-Winklaar a expresa. Esaki lo por yuda kita un lista di espera, si tin cualkier aumento den e cantidad di muchanan. Esey ta algo cu e mandatario por yuda y di otro banda planea un tiki mas delanta, mirando cu nan ta crea un buffer den nan presupuesto.
E otro efecto di e proyecto aki ta e por yuda e fundacion explora expansion di e tipo di alimentacion duna den futuro.“Nos ta sumamente contento cu e paso aki a tuma luga, y mi ta convenci cu esaki lo ta un inversion valioso y necesario pa contribui na comunidad henter.
