Director di Cruz Cora, Michel la Haye, ta conta riba e situacion di Venezuela y cu nan tin un papel crucial pa loke ta esaki. Cruz Cora ta un organisacion cu ta yuda hendenan den necesidad. Por ta cu tin algun Venezolano cu tin mester di proteccion.
Nan a pidi pa asilo y e grupo aki den e ultimo aña, casi el a redobla den cantidad. Cruz Cora ta yuda cu lo basico, manera alohamento, y cuminda. Tambe nan ta haya paña pa bisti. Ta purba mas pronto posibel pa yudanan cu un trabao, pa asina nan por mantene nan mes y no cu otro actividadnan no mucho bon.
Asilo
E personanan aki a pidi pa proteccion. Nan a pidi pa asilo. Awor aki Gobierno ta bezig cu e peticionnan aki y ta sperando riba e resultado. Mientras tanto, segun ley ta asina cu e hendenan aki por haya un permiso temporal pa trabao y estadia, te ora cu gobierno a dicidi su e persona ta haya asilo of no, e ora tin cu bandona e pais.
Con largo
Michel la Haye a splica cu mientras cu e hendenan no tin un luga pa drumi, Cruz Cora tin un cama pa nan. No ta asina cu nan tin cu keda drumi riba caya pasobra cu no tin un luga pa nan. Na e momentonan aki nan tin 48 persona cu a pidi pa proteccion. Algun di nan por a haya un apartamento of camber na Aruba y na e momentonan aki tin 5 persona na Cruz Cora.
48 persona
Cruz Cora no ta importa ki status un persona tin. Si e tin paspoort of si a haya asilo. E ta trata cu ta un persona y no tin un luga pa keda. E ora Cruz Cora ta yuda cu un cama of eventualmente cu cuminda of paña.
Yudansa
Algun di e hendenan aki ta cana kibra. Algun otro ta bay segun conseho di instancianan. Y tambe atrabes di conocidonan nan ta scucha cu Cruz Cora ta yuda y nan ta bin na e manera aki y ta pidi pa yudansa. No ta interesante pa Cruz Cora si un persona ta legal of ilega. Nan ta djis puntra ki yudansa e persona tin mester y di e manera ey ta yuda hende.
Edad
Un tercera parti ta menor di edad. Un tercera ta hende homber y un tercera parti ta hende muhe.
Contacto
Cruz Cora ta traha hunto cu gobierno. E opvang di buscamento di asilo ta bao di encargo di gobierno. Banda di esey cruz cora ta parnter di e organisacion di refugiado di Nacionnan Uni. Tin un persona staciona pa esey, e persona aki ta traha hunto cu Cruz Cora y danki na e organisacion aki, tin un staff pa por yuda e hendenan aki.
E necesidad
E pidimento di asilo ta un derecho humano. Pa haya esaki no. Y tin exigencianan estricto pa esaki. Minister Blok a splica cu automaticamente tur hende no ta haya asilo. Mester demostra un motibo pa por haya esaki. No ta algo por nada, pero si bo tin peliger den bo pais, bo por pidi proteccion cerca otro paisnan. Tin criterianan hopi estricto y si bo cumpli, un pais mester duna asilo.
Gobierno
La Haye a splica cu no tur ora nan tin reunion cu gobierno. Pero si ta tene gobierno na altura, cuanto hende tin cu ta pidi asilo, como tambe na e organisacion di Nacionnan Uni. Ta spera cu gobierno tuma un decision lihe riba e peticionnan aki.
Un prijs
Tin un prijskaart riba cada persona. Nada no ta por nada. Na e momentonan aki Cruz Cora tin cu carga cu e gasto di e personanan aki, La Haye ta splica.
