Diabierna ultimo, manera cu ley ta stipula, Gabinete Wever-Croes, den persona di Minister di Finansa, mr. Xiomara Maduro, a haci entrega di e presupuesto 2024 na Presidente di parlamento, mr. Edgard Croes. Y dialuna, gobierno tabata na parlamento un biaha mas, pa trata e presupuesto supletorio 2024.
Miembro di fraccion di AVP den parlamento, drs. Mervin Wyatt-Ras, a cuminsa na bisa cu Gobierno a bin presenta un presupuesto supletorio, cu segun Gobierno, nan a entreg’e trempan y tambe trat’e trempan. Pero, segun Raad van Advies a indica cu e no ta cuadra cu e cifranan real cu Raad van Advies tin.
Segun e presupuesto, economia ta bayendo mas miho, sinembargo, tin inflacion, prijsnan a subi. Pero, con por bisa cu economia ta bay bon, pero toch ta tuma medida? Contesta cu a haya, ta cu mester tene cuenta cu normanan. Ras a sigui bisa cu, esaki ta increibel, ya cu ta tene cuenta cu normanan, y ta laga e pueblo pasa hamber, ta corta nan awa y coriente, no tin placa pa pone riba mesa. Hasta e muchanan ta haya nan confronta cu medida, pasobra cu te hasta e schoolgeld a subi, drasticamente.
Cada biaha cu puntra ta haya contesta di manera arogante, na un manera como sifuera cu ta haci mofa di e parlamentario. Ras a sigui bisa cu loke e ta spera ta un contesta drechi y directo. mester stop di wak den pasado, kico a pasa. Ta tempo pa cuminsa wak den futuro.
Pa Parlamentario Wyatt-Ras, e presupuesto cu Gobierno a entrega ta uno cu no ta cuadra cu e realidad.
