Den Parlamento durante un reunion publico awe tabata obvio cu coalicion no por a cera “quorum” pa vota pa nan mesun mocionnan. A yama e reunion pa discuti encuanto di CAft y e protocol nobo cu Gobierno a cera cu Hulanda aña pasa pa supervision financiero. E cuadro y normanan di supervision financiero (LAft) tabata valido te cu december 2018. Prome cu esaki e Gobierno aki mester a bin cu un otro ley.
E protocol cu ta forma base pa e ley aki a ser firma aña pasa, sinembargo e ley di LAft mes no a yega Parlamento ainda. E comision encarga cu supervision financiero (Caft) a entrega su rapport pa loke ta presupuesto 2019 y pa di dos biaha tras di otro ta constata cu e splicacion di e presupuesto no ta suficiente y cu riba nan peticion Gobierno no ta otorga nan suficiente informacion. Entre otro pa loke ta trata e sociaal crisisplan y otro aspectonan.
Mervin Wyatt-Ras y su coleganan a haci varios pregunta pa haya claridad sinembargo e Minister, cu por cierto no tabatey durante henter e reunion, no a contesta tur pregunta sino tabata referi na documentonan cu ya Parlamentarionan a tuma nota di nan. Gobierno a introduci medida bao di nomber “crisisheffing” y a haya dividendo extra sinembargo no ta bahando su gastonan di luho y ta keda nombra amigo y famianan. Tin entendi cu lo bin cu mas medida y Wyatt-Ras a puntra Minister esaki. Tambe tin critica di CAft cu Gobierno no ta duna nan tur informacion dor di cual no por controla e presupuesto. Ainda no a fiha tampoco e sector colectivo. Ademas e meerjarenraming no ta realistico.
Por bisa cu Gobierno a entrega nos autonomia, pasobra awor Hulanda ta stipula cu p.e. pa loke ta trata dividendo mester bay pa paga debe. Tambe ta Rijksministerraad lo mester trata e LAFt nobo prome cu Parlamento di Aruba por haya dicho ley.
Den cuadro di esaki e Parlamentarionan di coalicion a entrega un mocion, cual ta duna Minister Ruiz Maduro un “brevet van onvermogen”. Tambe a ser entrega un mocion pa Henk Kamp no forma parti mas di CAft enbista cu e tabata politico. Aki atrobe ta indica cu Minister di Finanzas, a sabiendas cu esaki ta contra di ley di LAft di 2015, a bay di acuerdo. Wyatt-Ras ta haya un lastima cu a yama e reunion sin cu Gobierno a duna informacion nobo.
Por a scucha e Minister ta yora cu prensa ta publica informacion di e rapportnan di CAft cu ta bira publico asina nan ser manda pa Staten. Aki por nota cu e mesun Minister cu tempo e tabata Parlamentario hunto cu su colega Minister Presidente a lobby cerca tur politico Hulandes y prensa Hulandes pa Aruba ser poni bao supervision y bao curatela, cu awe no kier pa publica e rapportnan di CAft.
Na fin di e reunion a resulta cu e protocol firma aña pasa dor di Minister Ruiz Maduro Maduro no tin sosten di su coleganan di coalicion. E minister a entrega nos autonomia. E cu tabata grita antes cu e ta para fuerte den su sapatonan,awe ta cana riba klompen. “Zeg, het kan verkeren!”
