Tienda di Educacion cu ta cumpli 10 aña di existencia den 2022 ta sigui brinda servicio telefonico anonimo na henter comunidad di Aruba. For di su inicio, Yama 161 a bira e lema di e organisacion cu tin como meta pa duna sosten y guia na mayor, educador of cualkier persona cu tin educacion y lantamento di un mucha na su encargo.
No ta solamente e servicio telefonico di 161 Tienda di Educacion ta brinda. Tin varios otro servicio gratuito cu ta wordo ofreci cu ta consisti di duna charla, tayer y tambe informacion na diferente scol, gruponan meta of organisacion sea comercial, social of gubernamental. Tur servicio brinda na comunidad di Aruba ta completamente gratis. Mayor of educador por tuma contacto cu Tienda di Educacion pa cualkier pregunta ora ta trata lantamento di un mucha. Tambe si ta desea un conseho con pa comunica of disciplina un yiu. Por yama of bishita Tienda di Educacion tambe pa un consulta gratis na nan oficina situa den edificio di Centro pa Hoben y Famia, adres Wayaca 68-C.
Entrante 2022 e servicio telefonico di 161 ta conoce un adaptacion den orario. E servicio di 161 ta disponibel di dialuna pa diabierna di 8 am – 6 pm non-stop pa asina por sigui brinda e bon servicio manera semper. Por comunica cu nan tambe via e-mail: [email protected], por bishita nan pagina di Facebook, Instagram of YouTube channel of subi riba nan website www.tdearuba.com pa mas informacion.
Tienda di Educacion ta curasha mayornan, educadornan of organisacion pa tuma contacto cu 161. Tambe si ta desea di traha un cita of pidi pa un charla pa grupo di mayor of grupo di empleado tur esaki ta posibel. “Bon educacion por cambia hopi cos. Un bon educador por cambia tur cos”.
Tienda di Educacion ta pone enfasis ariba educacion di un yiu. Un sonrisa den cara di un yiu por haci milager. P’esey ta importante pa mayor of educador trece alegria pa nan yui(nan) por tin un infancia sano y desaroya positivamente. Tienda di Educacion ta sostene mayor, educador of cualkier persona cu tin e tarea pa lanta un mucha cu cualkier preocupacion of pregunta.
Bienestar y siguridad di nos muchanan ta responsabilidad di nos tur! Ban cuida y lanta nos muchanan cu hopi amor y compasion pa asina crea futuro generacion sano y di bon boluntad. Ta un bon ehempel pa nos muchanan y haci un diferencia positivo den nan bida.
