Minister “MiNo Sa”, pa e simpel motibo cu mayoria biaha ora puntr’e riba un asunto controversial of no bunita politicamente, e ta contesta “mi no sa”. Ta nada mas y nada menos cu nos prome mandatario, mr. Evelyn Wever-Croes.
Nos colega Brian Koolman a acerc’e p’un reaccion riba e echo cu Minister di Integridad, Ursell Arends a haya ta bon di intoxica curpa cu alcohol pa oranan largo na un Rumshop y djey bula tra’i stuur di aut’i gobierno cu cerbes den man. T’un situacion cu a sosode diasabra atardi na Pos Chikito Rumshop, caminda Arends a reuni cu ex-candidato di partido AVP, Tyson Lopez.
“Duna Cesar locual ta di Cesar”
E prome mandatario por lo menos ta asumi su responsabilidad y duna entrevista na tur cu puntr’e. Por lo menos na 24ora.com, e no sa nenga di duna entrevista. E prome mandatario sa cu aki pueblo ta mir’e, cu ta un di e motibonan tambe cu awe of te ainda, e ta e “votegetter” di pais Aruba. Durante pandemia, pueblo tabata mir’e casi tur dia riba 24ora.com, un audiencia mucho mas grandi cu riba e pagina di e propio Gabinete Wever-Croes y n’e planta di television di gobierno, Tele Aruba.
Hopi a mir’e
Despues di diesshete ora cu a publica e video caminda por mira claramente e actonan no integro di Minister Ursell Arends, casi 16 mil persona a mira e video, pa cual riba 240 persona sea a gusta e video of a harie y algun hasta a “love”. No menos di 182 persona hasta a comenta riba dje.
“Mi no sa”
Durante e ceremonia di traspaso di mando na Bestuurskantoor, a topa cu “Tanchi”, caminda a puntr’e riba e acto di su colega minister y e vice-prome minister di pais Aruba. “Mi no sa exactamente di kico bo ta papiando, miho nos laga e minister mes duna su reaccion”, tabata su contesta na nos colega reportero. E prome minister sa cu ora e contesta algo asina, ta masha dificil pa “doorvragen.” Tipo di contesta asina ta categorisa nan como un contesta “cera”. Pues, te ey e combersacion a yega tambe.
Ursell Arends bou presion
E lider di plataforma RAIZ y alabes minister di integridad ta bou presion p’e simpel echo pa evalua si e ta para pa su palabranan of si e ta haci manera e politiconan tradicional di “keda wanta” n’e stoel di minister. Si e keda wanta n’e stoel di minister, e ora ey nunca mas Ursell Arends y tampoco plataforma RAIZ por papia di integridad. Sea ta busca un otro strategia pa campaña of ta retira. RAIZ a bay campaña cu e slogan “keep them honest”, locual e propio Ursell Arends a reconfirma riba 24 di januari ultimo. Dia cu a firma acuerdo di gobernacion Arends hasta a menciona cu; bo mester ta integro hasta ora e luz di faro no ta riba bo. Su frase a dura net dos aña te ora a gar’e ta consumi cerbes na ordo di dia y pa “take-away” hast’un boter di cerbes den man a cana subi aut’i gobierno y stuur bay su cas na Sabana Blanco. Un berdadero mal ehempel pa nos comunidad!
