Prins y Pancho Hubenil (Hisa benta pa mi cuenta) tabata e prome personahenan di carnaval pa hiba palabra na e ceremonia di entrega di mando dilanti cede di Gobierno. A apela na hobennan engrandece carnaval den forma sano. Acto den gang no ta haci bo rough, pero ta causa daño, tabata un di e mensahenan positivo cu el a manda. A pidi pa bini cu un Trai Atardi y mas inversion den deporte pa hobennan. “Hoben controla bo mes, stima bo mes, no bebe,” ta otro parti di e mensahe.
Nan a ricibi e spada simbolico pa defende e hobennan den e temporada aki.
Pancho Adulto, tambe tabata presente cu un mensahe. E tabata ganado den e categoria di edad mas halto. Nan a gana e premio como Prins y Pancho Klap E. Solamente e Pancho tabata presente. E tabatin mensahe chistoso den forma di rima. A papia cu den e categoria aki ta haci joke, sin insulto. Tambe a bisa cu nan por sirbi pa guia hobennan. A apela pa tene eleccion di reina y prins & pancho den bario, pa engrandece e eleccion final.
Na final a hiba palabra Prins Show y Pancho Time, di Champagne Carnival Group. A hiba un mensahe, manera semper hopi chistoso. Y a pidi pa bini cu un programa pa stimula carnaval den bario; pone concierto estilo Romeo Santos pa bandanan haya mas exposure; pone mas iluminacion den Franse Pas y pone Parada di Luz. Pidi pa tayer den Cocolishi pa prepara hobennan pa Prins y Pancho. A pidi pa bini les di cosemento inmediatamente despues di cierre di temporada pa e candidatanan por haya nan trahe na tempo.
Y mas cu tur cos a pidi pa paz entre Musica y SMAC.
Prome Minister mr. Evelyn Wever Croes a entrega e yabi na Prins y Pancho pa nan por habri inicio di Aruba su carnaval.
Awe nos ta celebra un momento historico cu traspaso di mando, Darren van Ommeren. Un fiesta cu ta uni un pueblo completo pa demostra Aruba su creatividad na mundo henter. P’esey SMAC lo sigui motiva hobennan cu hermentnan necesario pa celebra e evento cu ta parti di e cultura di Aruba.
“Nos kier pa nan carga e cultura aki y sigui cu e celebracion den nan curason,” e presidente di SMAC a bisa na hobennan, kende nan ta mira como e futuro di e celebracion aki. Y a agrega cu ta importante pa brinda apoyo na e gruponan di carnaval. P’esey e tin hopi respeta pa cada carnavalista cu dia y anochi ta prepara pa e evento aki.
Union, creatividad y respet pa un y tur, el a pidi.
Tambe a hiba palabra Ivy Simon Hernandez, di Quota Club Aruba, kende a pidi pa un y tur den carnaval 70 tene cuenta cu oido su proteccion.
Pa finalisa, a hiba palabra Prome Minister mr. Evelyn Wever Croes. Cu ta ricibi e personahenan na sede di gobierno ta mustra e importancia cu carnaval ta pa pais Aruba. “Mi a scucha hopi bon mensahe,” e mandatario a bisa. “Mi a scucha hopi mensahe y palabra. Setenta aña di celebracion ta algo grandi cu nos tur mester ta orguyoso di dje y mester cuid’e. Critifca semper ta parti di dje, critica constructivo pero no destructivo.” El a pidi pa stima carnaval y sigui engrandece.
“Mi ta traspasa e mando pa Prins y Pancho awo, y mi ta baha cu vakantie,” e mandatario a bisa.
E personahenan chistoso di temporada di carnaval 70 ta:
Infantil: Prins Caya pidi (Arnold Malmberg) y Pancho Caya haya: (Jayven Jansen) di Don Flip Carnival Group.
Hubenil: Prins 70 (Cayle Vis) y Pancho Na Benta (Edan Geerman) di Champagne Carnival Group.
Grandi: Prins Show (Samuel Winklaar) y Pancho Time (Jerwin Mercera) di Champagne Carnival Group.
Adulto: Prins Klap (Anthony Dijkhoff) y Pancho E (David Simon) di Adju Upholstery.
