Den un conferencia di prensa extraordinario awe merdia, Prome Minister di Aruba y alabes lider di MEP, mr. Evelyn Wever-Croes hunto Minister di Integridad y alabes lider di RAIZ, a informa cu a tuma un decision tocante reforma fiscal, cu ta un parti di e Landspakket firma cu Gobierno di Hulanda.
Un parti di e reforma fiscal, Prome Minister a bisa, ta concerni e asina yama introduccion di BTW (Belasting over de Toegevoegde Waarde) of na Ingles conoci como VAT (Value Added Tax). Den cuadro di esaki Departameto di Impuesto (DIMP) a reuni cu gremio y minister-president tambe a bisa di a reuni cu varios partner strategico den comunidad.
A scucha e preocupacion di gremio comercial y sindical riba introduccion di un BTW. E preocupacion principal tabata e efecto inflatorio, pero tambe e preocupacion di comercio ora cu a indica cu lo no baha e BBO pa despues bin cu BTW. Tur esaki lo haci e efecto inflatorio mas halto!
Basa riba e calculacionnan di e efecto inflatorio di e idea di BTW y en bista di e guera di Ucrania y su efecto na Aruba, Gabinete Wever-Croes II ta haya cu no ta prudente pa introduci un BTW pa dia prome di januari 2023. A yega na e conclusion cu no ta introduci BTW mas por lo pronto. P’esey, na luga di introduccion di BTW, di 6 y 14%, ta contempla pa un aumento di BBO di 1 pa 1.5% extra riba e 6% cu nos conoce awendia.
