Despues di a analisa tur e informacion ricibi for di e profesionalnan di e departamentonan di gobierno y e ambtenaarnan cu ta haci tur e ehercicionan pa por tuma un decision responsabel, a conduci na cambio di vision relaciona cu reforma fiscal. Despues cu pa e ultimo añanan a indoctrina e pueblo cu BTW ta e caminda pa cana debi cu e no ta cumulativo, etc., awe e mesun ministernan a sali bisa cu BBO toch ta miho y a para introduccion di BTW y na su luga lo aumenta BBO cu 1 pa 1,5% mas.
Minister Ursell Arends, den su calidad di vice-Prome Minister a indica cu e mensahe di Hulanda ta cla y raspa: Si Aruba no yuda su mes, ta Aruba mes mester paga e debe bek. Esaki ta conduci bek na e discusion entre BTW y BBO. Gobierno a fiha un posicion y ta propone BTW y a para pa esaki.
Pero gremio y pueblo a indica cu e tempo ta hopi cortico, cu e ta hopi riba man. Gobierno a para responsabel despues di analisa e efecto di e invasion Ruso na Ucrania, el a conduci cu prijs di bari di petroleo a aumenta, cual a haci cu prijs di gasolin a subi y tambe e prijs di awa y coriente.
Como lidernan responsabel, gobierno ta propone un fase transitorio, unda cu den 2023 ta aumenta BBO pa asina yuda cubri e deficit y den 2024, lo introduci BTW. Aworaki ta duna un tempo amplio, pa por discuti esaki den un dialogo y yega na un miho palabracion cu comunidad. Cu e coalicion MEP-RAIZ di berdad lo aumenta impuesto y introduci BTW un aña prome cu eleccion, ta un pregunta cu ta keda den aire.
Pa un relato mas amplio, lesa e edicion di TREMPAN di mañan.
