Médiko Merikano ku komunidat di Kòrsou na pechu ta hasi bunita gesto

294

Luna pasá Curaçao Medical Center (CMC) a risibí dos grupo di médiko Merikano ku a bin ku e propósito pa duna asistensia na Kòrsou si’akaso surgi un brote relatá na COVID-19, p’asina CMC por sigui sigurá kuido médiko na tur otro pashènt mas normal ku ta posibel.

Mientras ku no tin brote, e tim di spesialista ta sostené e diferente departamentunan na Curaçao Medical Center a base di nan ekspertisio. Den e periodo kòrtiku ku e tim ta na Kòrsou, ya por a nota ku nan tin komunidat di Kòrsou na pechu. CMC ta kompartí un di e eksperensianan kaminda un médiko Merikano a hasi un bunita gesto na un miembro di nos komunidat. Den nan tempu liber, e spesialistanan Merikano ta eksplorá Kòrsou i ta serando amistades ku kurasoleñonan ku nan ta drenta den kontakto ku né. CMC a tuma nota di un bunita gesto ku un di e spesialistanan a hasi pa un yu di Kòrsou resientemente.

E spesialista, Dr. Winston Thomas, a konosé un persona na kual e a disidí di hasi un gesto di su kurason. E dòkter i su kolega mester a hasi uso di taksi pa bai diferente sita, i asina a drenta den kontakto ku un taksista ku a duna nan asina bon trato ku nan a kuminsa hasi uso di e taksista su servisionan regularmente. Den e interakshonnan ku a sigui dòkter Winston a haña un bista di e efékto ku e pandemia tin riba ekonomia di Kòrsou i spesífikamente kiko e periodo aki a nifiká pa diferente hende na Kòrsou finansieramente. Entre otro e taksista no por a mantené su vehíkulo mas i tabata fia un outo pa por keda duna servisio di taksi. A krese e sintimente seka e dòkter pa hasi un gesto pa e kurasoleño aki por mehorá su situashon, i asina e la disidí pa kumpra un vehíkulo pa e taksista por sigui mantené su famia.

CMC ta sumamente kontentu ku e tipo di dòkternan humilde ku a bini Kòrsou, ku no solamente ta ofresiendo sosten médiko, pero alabes tin bienestar di komunidat di Kòrsou na pechu durante e periodo ku nan ta permanesé den nos país