Louis Kirindongo di kustwacht, durante entrevista a splica cu ora cu coy boto, ta depende con e caso ta draai. Ora cu coy boto, hopi biaha ta ministerio publico ta confisca nan y hopi biaha ta nan tin cu laga e caso cana. Tin boto ta wordo uza, cu ta botonan cu a wordo horta, of raporta. Na Venezuela, e doño a laga hende bay pisca cu e boto, pero a uz’e pa otro meta. Ta haya cu diferente cos ta pasa mey mey cu na e momento ey mester duna un tiki espacio pa e caso por cana y den e caso tanten cu e investigacion tuma luga, bo ta haya hopi informacion pa bo sa kico ta bay haci cu e boto mas despues. Pero esey ta den man di ministerio publico pa dicidi kico ta bay pasa cu e boto. Si e boto eynan ta bay wordo destrui despues, of kico ta bay pasa cun’e precies. E ora ey Guarda Costa tin e boto in bewaring, pendiente di locual cu ministerio publico bisa pa haci cu e boto, e ora ta sigui haci. Guarda Costa tin basta boto cu nan a yega di gara y tin diferente di nan tambe cu ta pendiente di decision, kico tin cu bay pasa precies, pa asina ey sa kico tin cu haci cu nan. For di Venezuela sigur e 95% di e botonan confisca ta. A hayanan cu contrabanda di hende, a haya cu droga pero tambe arma. Otronan a hayanan pega na costa despues cu nan a sea trece droga, hende of arma. Practicamente ningun di e botonan aki ta sirbi. Esnan cu a viola ley dimes a bay sera tambe y boto no ta wordo duna bek.
