“Awe e ta bisa cu no ta su cartera ni responsabilidad pero minister-president a yeg’i mina e competencia y responsabilidad di minister di enseñanza varios bes caba. El a sinta na mesa cu e actornan envolucra den enseñanza, haci palabracion y awo cu e ta ripara cu e no por cumpli, e ta bisa pa laga minister Lampe so bay duna cuenta na Parlamento”, asina drs. Marisol Lopez-Tromp a. bisa awe mainta. E ta sinti cu tin un labamento di man di parti di gobierno, pa no cumpli cu locual nan tur, incluyendo MEP a priminti na e docentenan prome y durante vakantie.
Lider di fraccion di MAS, drs. Marisol Lopez-Tromp a bisa awe di ta corda cu minister-president mes a bisa cu el a purba interveni na varios ocasion. Dia 24 di juni Prome Minister a pidi SKOA pa no kita ningun trahado di limpiesa fo’i trabou. Tambe Minister President a stop e decision di Minister Lampe pa habri e MAVO 3 na Colegio Nigel Mathew. Tambe Prome Minister a stop e decision caminda cu por medio di un carta Gobierno a manda kita e trahadonan di limpiesa di DPS cu tabata den servicio como reemplasante.
“Pues ta mas cu logico cu nos kier Minpres su presencia den reunion publico den Staten, hunto cu Minister di Eseñansa, si e tin algo di bisa ainda”, asina parlamentario Marisol Lopez-Tromp a solicita awe. Su declaracion ta bin hunto cu esun di MEP awe mainta cu tambe a bisa cu minister Lampe no ta gosa di confiansa mas di un mayoria den parlamento. Hasta a insinua cu no por descarta un mocion di desconfiansa contra dje, si esey presenta. Lo no ta e prome mocion contra e minister pero si e por bira esun crucial unda mayoria lo aprob’e y asina kit’e fo’i trabou siendo demisionario.
