Na prome nos kier hala atencion fuertemente di mayor, cu nan mes ta piedra di trompica pa nan propio yiu. Nos ta reprende e asunto aki di reis den nomber di Cristo Hesus. Pasobra ta imposibel pa un persona por stroba su propio simia di avansa den bida y specialmente den e caminda di Dios.
1 Corintio 8:9 ta bisa: “Ma tene cuidao pa e libertad aki di boso, di un manera of otro no bira un piedra di trompica pa esunnan cu ta debil.
Esaki ta nifica cu abo como mayor no por ta haci nada fo’i boluntad di Dios y asina pone bo yiu trompica for di awo of den un futuro. Por ehempel bebe of droga, pleita y bringa den presencia di mucha, comete adulterio den presencia di mucha, siña mucha gaña, siña mucha sconde maldad, abusa di mucha, uza mucha como victima pa abo como mayor haya placa.
Deuteronomio 6:6 y 7 ta bisa: “E palabranan aki cu Mi ta ordo bo awe, mester ta riba bo curason. Siña nan cu tur diligencia na bo yiunan y papia di nan ora bo ta sinta den bo cas. Ora bo ta cana riba caminda, ora bo ta bay drumi y ora bo lanta.
Ta nos deber pa lanta nos yiunan diligente y sabi den tur cos, pasobra esey ta agrada Dios. Nos yiunan tanto mucha muhe of mucha homber, mester ta diligente na cas, sabiendo con mester tene un cas limpi, con ta laba paña, con ta strica, con ta cushina. Esaki ta deber di tur mayor pa siña nan yiu. Si bo tin un yiu riba 12 aña e mester por haci e deber di mantencion di cas. Pero esaki no ta pa uza e mucha como esclavo pero pa planea su bida den futuro, ora e tin su propio cas of ora e bay studia den exterior.
Proverbio 20:11 y 12 ta bisa: “Te hasta un mucha ta conoci pa su echonan. Si su conducta ta puro y recto. Horea ta pa tende y wowo cu ta mira. Señor a traha tur dos.
Ta depende 80% di e mayor kico e a siña su yiu y con e yiu su actitud lo ta. P’esey como mayor nos mester para firme, pa den un forma sano, sin violencia of palabra malo, coregi nos yiunan. Y nan lo ta gradicido mañan cu Dios kier, cu nan mayor tabata consciente cu nan educacion.
Deutoronomio 4:9 ta bisa: “Solamente paga tino y warda bo alma cu tur diligencia, pa bo no lubida e cosnan cu bo wowo a mira y pa nan no kita fo’i bo curason tur e dianan di bo bida. Ma siña nan na bo yiunan y na bo nietonan.”
Wak e encargo cu Dios ta duna mayor no solamente na bo yiu, pero ora bo tin nieto pasa e palabra di Dios y e disciplina di Dios den Efesios 6:1-4 pa nan, pasobra esey ta bo deber como mayor.
Proverbio 23:24 ta bisa: “Tata di e husto lo tin gran goso y esun cu hay’un yiu sabi lo tin delicia den dje.”
Mayor educa bo yiu pa e ta un gran bendicion pa bo y pa comunidad.
