Den cuadro cu reactivacion di e dialogo nacional tripartidista, entre Gobierno, sindicato y doñonan di trabao, ta bay tin e temanan di salario minimo, edad di pensioen, uitzendbureau, ley di ARBO y revision di tur e leynan cu a wordo introduci na 2013.
Minister Glenbert Croes, den un conferencia di prens di gobierno kier sigura cu ora cu bisa kico e lo bay bira, lo tin un posicion amplio di apoyo riba dje. Loke tur ta resalta cu aumento di edad di pensioen, apesar cu por a suavisa e fondonan di pensioen, hecho ta cu aumento di edad di pensioen ta impidiendo hobennan drenta den mercado laboral. Mas hopi hende mester traha, ta menos vacatura ta habri pa hobennan cu kier drenta mercado laboral. E ora bo tin hobennan sin trabao. Hobennan cu ta perde speransa y cu ta sinti cu comunidad ta bira lomba pa nan. Nan ta coy un mal rumbo y despues nos kier keha. E ta bay ta un di e puntonan den e dialogo nacional tripartidista.
Awor aki e edad di pensioen ta 65. Gobierno ta kere cu 65 aña no ta corecto pa Aruba. Si otro pais kier haci’e pa 67 ta nan asunto. Nos tin derecho como ciudadanonan cu yega na un edad di pensioen, por bay disfruta di nos nieto y nietanan, disfruta di bo pareha, disfruta un tiki bida, pa e sacrificio di e añanan trabao cu a haci.
Tin un realidad cu e fondonan di pensioen ta bao di presion. Kisas lo kier hiba e discusion pa haci’e 62. Ta compronde cu e no ta un posicion cu bo por hib’e unilateralmente, sino tur hende mester bay carg’e. Kier pa tur hende apoy’e tambe. Segun e minister, e ehercisio cu ta bay haci atrabes di comisionnan tecnico cu ta bay traha, expertonan, ta e dialogo nacional tripartidista, ta pa busca e manera unda cu ta bisa no, tin forma pa haci’e y di e forma ey tur por carg’e. Ora cu e bay conseho di minister pa un aprobacion final, ora cu e bay un parlamento pa un aprobacion final, por bisa cu ta bay haci’e edad di pensioen pa tal edad, cu un base amplio di apoyo y consideracion pa e posicion cu ta aden. Ta un posicion cu no ta solamente cu ta compaña e discusion riba edad di pensioen. Ta un posicion cu ta compaña na ki nivel bo kier haci, hisa e salario minimo.
Ta un posicion cu ta compaña henter e problematica di Uitzend bureau, cual e minister ta considera un problema grandi den nos comunidad. Trahadonan cu nan derecho sistematicamente ta wordo viola, leynan cu ta wordo viola atrabes di e practicanan ilegal di Uitzendbureau cu a wordo tolera den e ultimo añanan, cu gobierno actual no ta tolera pa cualkier comision di investigacion cu ta andando. E ley di ARBO. E ta cla caba. Ley di ARBO ta basicamente condicionnan di siguridad, salud, bienestar di trahadonan, unda cu ora bo bay un trabao, cu e doño di trabao tin e obligacion di garantisa cu e condicionnan den unda ta traha como trahado, no por ta den perhuicio di salud di e trahado, no por ta den perhuicio di siguridad. No por ta den perhuicio di bienestar di e trahado.
Kico ta e reglanan cu ta wordo imponi riba e doño di trabao
E condicionnan bao di cual e trahado, vooral awo cu e tema di reapertura di refineria, kier pa e trahadonan cu ta traha den refineria, trabao abao di e condicionnan safe. Vooral awor aki ta bin temanan di exploracion di petroleo y gas. Por a mira kico a yega di pasa den pasado otro caminda. Ta cosnan cu mester tuma sumamente na serio. Gobierno ta compronde si, cu e minister ta realisa cu ta facil pa pusha den un direccion cu ta kere firmemente den dje pero ta desea pa comunidad henter, representa pa e comunidad organisa, atrabes di sindictonan, e trahadonan, atrabes di e sectornan di doño di trabao y organisacionnan, pa tur para tras di e caminda aki, pa ora cu e leynan aki pasa, y mester drenta implementacion, pa tur instancia coopera.
