AVP: Gobierno no a hedge y awo cu WEB a bati alarma ta sconde carta pa Parlamento

Fraccion di AVP a dirigi un carta na Prome Minister relaciona c’un carta cu gerencia di WEB Aruba NV a dirigi na hunta di comisario di companianan di utilidad y tambe na Prome Minister den cual ta solicita pa aumento di tarifa di awa y di coriente, lider di fraccion di AVP, sr Marlon Sneek ta mustra.

Sinembargo pa sorpresa, el a tuma nota di un comunicado den medionan di comunicacion di Parlamentario Vrolijk di fraccion di MEP, ta pidi Marlon Sneek pa e manda e carta di WEB pa su persona, y aki sr Sneek a miustra cu e ta kere cu Vrolijk a bruha formalmente, pasobra e no ta controla Parlamento pero su Minister.
Esaki ta bolbe mustra cu e chearleader aki di gobierno den Parlamento, ta cuminsa baila na son di su lider na luga di realmente para banda di pueblo y pidi pa e carta cu Minister Presidente tin den su poder masha dia caba.

“Mi a kere cu mi lo a haya sr. Vrolijk bin dilanti bisa cu MEP tambe ta pidi un debate publico, cu MEP tambe ta exigi e carta pa sa kico ta bay pasa cu nos comunidad, pero na luga di esaki sr. Vrolijk ta scoge pa pidi Marlon Sneek pasobra supuestamente Marlon lo tin e carta aki.
Nos a manda pidi Prome Ministe e carta y Prome Minister ainda no a contesta y nos a pidi tambe un openbare bijeenkomst cu e top di WEB pa haya sa e berdad y haya informacion concreto di loke ta pasando den henter e asunto di aumento di prijs di awa y coriente.
Nos conoce nos Prome Minister cu ta troce tur palabra, pasobra el a bisa cu e no a haya e carta y e no sa nada di carta pa despues den su rueda di prensa nos por a scucha su persona contesta WEB pa nan bay “snoei” den gastonan prome.
Con prome minister ta bisa WEB pa nan bay “snoei” prome si e mes ta bisa cu e no a lesa e carta, esta cu prome minister no sa contenido di e carta y aki nos ta mira un gañamento.
Prome Minister a haya e carta y a lesa e carta y aki ta bon pa mustra cu transparencia tabata e punto no. 1 cu su gobierno a pone den su programa di gobernacion y nos ta spera cu nan cumpli cu e transparencia aki y manda e carta pa Parlamento p’asina tur e 21 Parlamentarionan por hay’e, pa haya sa contenido p’asina cada Parlamentario y e fraccionnan por fiha posicion di unda nan ta para.
Sigur despues cu a haci un trabou grandi pa garantisa cu WEB por a baha prijs di awa cu 33% y prijs di coriente cu 15% y awe nos ta tende despues di un par di luna, 9 luna, cu e bandidonan aki ta na mando, ta tende caba c’un biaha mas ta bay hisa prijs di awa y coriente y purba di tira esaki riba un otro grupo cu ta reclama riba e efecto di huma.
Aki nos tin cu mustra pueblo cu gobierno actual no a bay hedge, ya cu esaki tabata un propaganda politico cu nan a uza durante di campaña caminda a bay ‘play tough.’
Por a scucha sr. Henriquez, representando trahadonan di WEB, den un entrevista bisando bon cla cu prijs di fuel a cay te na 40 dollar y no a hedge y awo e prijs a rementa bay halto y esey ta e motibo pakico mester paga mas na prijs di awa y coriente.
Riba dje nos tin un Prome Minister kende ta sconde informacion pa comunidad, ta sconde informacion pa Parlamento y no ta manda e carta pa nos sa kico en realidad a pasa.
Nos informacionnan ta bisa cu no ta e carta aki so pasobra tin mas carta cu a wordo manda prome, na unda gerente di WEB a bati alarma y bisa of puntra si ta bay hedge, ya cu ta bay tin consecuencia pa Aruba pasobra e prijsnan ta subiendo.
Gobierno no a tuma e decision y awe pueblo tin cu bolbe paga recibo halto pa motibo di mal maneho, di incapacidad di Gobernantenan cu nos tin na Aruba. Mi ta spera cu MEP tambe pidi e carta aki pa nan por informa nan mes.
Locual mi a spera cu lo bini dilanti den e rueda di prensa ta e contestanan cu a drenta diabierna riba loke ta preguntanan cu sr. Vrolijk hunto cu e chearleadernan Croes y Tjon a haci riba e contractnan cu a wordo cera bou di SERLIMAR. Mi kier informa di biaha cu di aki banda nos ta bay pidi un Openbare bijeenkomst pasobra nos kier scucha di Raad van Toezicht.
Nos no kier pa Ministernan bin Parlamento hunga show cu screen grandi bin conta storia. Nos kier RvT pasobra nan ta esnan cu ta responsabel, nan supuestamente ta tuma e decisionnan. Nos kier sa con e decisionnan aki a wordo tuma,” Parlamentario Marlon Sneek a declara.