Sin duda ta na su luga pa felicita gobierno nobo di pais Aruba, cu diabierna atardi a huramenta dilanti di Gobernador y caminda nan lo tin e tarea y responsabilidad grandi di sigui cu transformacion y progreso di pais Aruba logra den ocho aña pa dos gobierno di AVP, pero na mes momento haci realidad tur loke a priminti pueblo di Aruba durante di campaña electoral.
Esaki miembro di fraccion di AVP den Parlamento, sr Marlon Sneek ta mustra dunando indicacion cu ya caba prome cu a huramenta y mesora despues, ya caba Gabinete Wever Croes a faya di duna contenido na su grito di campaña, esta di “Bisa loke bo ta haci, y haci loke bo ta bisa.”
“Ora cu tuma nota di e formacion di e gobierno di MEP aki, nos tin cu tuma nota cu no solamente Prome Minister Wever Croes no a duna contenido pa su lema politico, pero simplemente a pone esaki un banda pa asina e por a bira Minister Presidente.
Durante ultimo siman e lider di MEP a manda mensahe bon cla pa partidonan POR y RED bisando cu e lidernan politico aki cu no ta compronde e concepto di 7 Minister, nan busca otro forma di goberna ya cu pa partido MEP, aki ta “bisa loke bo ta haci y haci loke bo ta bisa.”
Sinembargo ya pueblo por a mira cu NO ta 7 Minister a huramenta pero 8 Minister y aki caba a faya den su promesanan firme cu pueblo.
Pa colmo pueblo henter y mundo politico a keda altamente sorprendi ora cu e Ministerio di Salubridad, a cay bou di Minister Dangui Oduber ya cu practicamente e no tin ningun clase di experticio riba e tereno aki y a confirma cu dr Vallejo kende a haya basta voto riba lista di MEP, pa motibo cu no a lague drenta den Parlamento, lo bira e Consehero principal di Dangui riba e tereno aki.
En realidad dr Vallego ta e Minister di Salubridad sin cartera pero lo wordo paga e salario di Minister como consehero y aki ta bolbe ripara cu Aruba a haya un Prome Minister den persona di Evelyne Wever Croes, un lider cu ta insisti pa “bisa loke e ta haci pero NO ta haci loke e ta bisa,” Parlamentario Marlon Sneek a trece dilanti.
