Sin e sosten di POR y RED, atrabes di nan lidernan di partido, a mustra confiansa pa cera un coalicion cu MEP, pasobra nan so nan no lo por a form’e. Danki na nan disponibilidad y tambe na e decision pa pone diferencianan politico un banda y traha pa un Aruba, awe por papia di un coalicion.
Na demas pueblo di Aruba cu talbes no a kere den nan, of no a pone confiansa den nan, ta cosnan cu ta masha normal y ta bon pa democracia, Evelyn Wever-Croes, ta garantisa cu e gobierno aki ta bay traha pa tur, ta bay traha pa henter Aruba. Ta papiando aki di un Aruba y awor aki ta bay p’adilanti cu e bandera di Aruba y no e banderanan politico.
Aruba tin retonan hopi grandi su dilanti y pa por enfrenta e retonan aki mester di un Gobierno stabil. Pa a logra e Gobierno stabil aki, a bay den negociacionnan di coalicion. A tarda hopi, a test pasenshi di hopi hende. Hasta e pasenshi di nan mes a wordo getest. E partinan mas dificil di full e proceso ta, cu no por duna informacion di kico ta pasando y ta bon mes cu informacion no ta sali pafo, pasobra e ta stroba un negociacion. Ora cu ta negociando, semper ta bon pa tene cosnan ey paden y akinan tin cu bisa cu ta aprecia e pasenshi cu nos hendenan, specialmente a demostra.
Wever-Croes tabata haya reclamo y comprendibel cu ta bisa cu durante campaña tur ora ta reuni. Pero den e proceso no a tende nada. A palabra un media stilte, pero pa purba di yega toch un coalicion, a obliga di tene e silencio eynan.
Tabata hopi fastioso tambe pa scucha tanto rumor cu tabata tin. Y no ta tur cos por sali y bisa kico si ta pasando, pasobra e ta daña e posicionnan den e negociacion. Wever-Croes ta pidi disculpa cu no tabata mucho habri durante e periodo aki. Cada bishita na Gobernador practicamente e tabata cer’e cu un conferencia di prensa eynan mes, unda cu por bisa unda cu ta para. Tabata tin dos of tres biaha tras di otro caminda cu ta bisa cu ta na mesun caminda para. No tabata tin nada nobo pa trece padilanti, pero e simpel hecho di enfrenta prensa, papia cu prensa, contesta pregunta, elimina cierto rumornan cu tabata tin, eseynan ta cosnan cu a yuda. Prensa tabata tin un rol ehemplar den e proceso aki, pasobra cu ki ora cu a haci un apelacion na prensa pa ta presente, y nan tabata tey. Prensa a hiba e mensahe tur caminda y na un forma obhetivo, na un forma informativo y esey ta algo cu sinceramente Wever-Croes a aprecia hopi. Naturalmente ta keda semper cu e oponente principal, cu ta move cierto miembronan di prensa pa ofende, pa lastra pa keda busca tur caminda si algo a bay robes. Nada no a bay robes. Ta pueblo a pidi un coalicion. A tuma e responsabilidad eynan. Mescos por a bisa cu no ta bay den coalicion. Bay den coalicion bek pa haya un mayoria. Naturalmente, tin conseheronan cu tambe ta bisa pa no traha cu un of otro partido, pero na final a mira un bista mas amplio cu ta Aruba.
Aruba a pidi un cambio y MEP tabata tin e oportunidad unico pa brinda e cambio ey. Awor aki tin un coalicion. Tabata tin un reparticion di cartera, tin e personanan minister y parlamentario y presidente di parlamento. No por complace tur hende, e ta sigui bisa. Esey ta e parti di mas dificil. Hopi importante ta, comunicacion den e fase aki. Pero na fin di dia, door cu ta un coalicion mester a forma, tin cu reparti e carteranan y no por keda cu tur e carteranan. Esey ta algun hende ainda kier mas splicacion y lo duna esaki tambe. Wever-Croes a menciona cu e ta hopi transparente den esaki.
Pero pa yega na un coalicion, mester a negosha, caminda cu algun hende ta haya algun cos, y otro hende ta haya otro cos. Ningun hende por haya tur cos. Pero na fin di dia, e ta hopi satisfecho, Wever-Croes a menciona.
