Partido MAS encabesa pa liber di fraccion Marisol Lopez Tromp a reacciona mesora y fuertemente riba, locual e ta considera un engaño di Vice Presidente di Parlamento, parlamentario Kamperveen di RAIZ, cu e reunion cu a yama riba contrato cu Eagle LNG.
A tuma nota di un invitacion cu a drenta, caminda a laga yama un ‘Openbare Bijeenkomst’ den Parlamento otro siman pa trata e tema menciona. Lopez Tromp ta enfatisa cu oposicion (fraccion di MAS, ACCION 21 y AVP ) na ningun momento a pidi pa un bijeenkomst pero a pidi un reunion Publico riba e contract cu Eagle LNG.
Den un ‘Openbare Bijeenkomst’ un parlamentario NO por uza ningun ‘tools’ pa coregi Gobierno, ta locual cu parlamentario Marisol Lopez Tromp ta señala. E ta menciona cu:
* NO ta posibel pa debati cu Minister.
* NO ta posibel pa presenta un mocion pa expresa un deseo of pa coregi gobierno.
* NO por presenta un mocion pa baha un Minister.
Locual e reunion aki ta encera ta solamente sinta scucha, mira presentacion di Minister Glenbert Croes, kende por cierto legalmente no ta e minister encarga cu energia, esey ta Minister-President y nada mas.
Parlamentario Lopez ta sigui menciona cu ta con Minister Croes por bin duna un presentacion den Parlamento si e no a ni lesa e contract? Pakico un presentacion despues cu ya a firma y mara Aruba?
Tin un MENTIRA den e Oproep di Parlamento pa e reunion. Fraccionnan di MAS, ACCION 21 y AVP pues NO a pidi un Openbare Bijeenkomst, pero pa un reunion publico pa pueblo por haya transparencia por medio di un debate y caminda parlamentarionan por uza nan poder cu pueblo a duna nan pa represente y actua.
Ta locual cu lider di fraccion di Partido MAS Marisol Lopez Tromp a duna di conoce riba su red social como reaccion na e reunion yama pa otro siman.
