Lider di Fraccion di POR, Marisol Lopez-Tromp a comenta riba e acuerdo cu Minister di Infrastructura, Otmar Oduber a firma cu FCCA pa construccion di casnan social, cual mester cuminsa otro luna.
Den e acuerdo cu e mandatario a firma cu FCCA a a prescribi den un documento e metanan cu ta bay tin en comun entre e ministerio y e directiva di FCCA pa loke ta construccion di casnan social pa e temponan nos dilanti.
Pa Lopez-Tromp, esaki ta hopi importante debi cu durante e ultimo 8 añanan ou gobiernacion di ex minister Sevinger no a traha casnan social debi cu su interes tabata otro caminda. Consecuencia di esaki ta cu tin un lista di espera di alrededor di 2400 persona inscribi na FCCA cu ta en espera di un cas social.
Den e acuerdo firma tin hasta poni e metanan manera ta e cantidad di cas, e forma den cual lo traha hunto, e formanan di construccion cualnan ta habri pa metodonan nobo, entre otro.
Igualmente den e acuerdo aki ta duna atencion den un forma di cooperacion conhunto no solamente entre ministerio y FCCA, pero tambe Ministerionan di Asuntonan Social y Husticia. Esaki debi cu lo concentra riba diferente aspecto cu mester tin presente den e barionan, manera ta barrio regiseur y trahadornan social por ehempel. Esaki por sosode solamente cu un cooperacion entre e ministerionan.
Marisol Lopez-Tromp ta bisa cu ta importante por ehempel pa Ministerio di Asuntonan Social tin voz den e aspecto di cual ta e tipo di casonan cu ta bin na remarke pa haya vivienda social cu urgencia. E construccion di casnan social no ta solamente e aspecto infrastructural y economico, pero tambe e aspecto social.
Parlamentaria di partido POR ta manda palabranan di hopi pabien pa yega na e acuerdo aki cu ta algo hopi necesario, specialmente despues di 8 aña caminda cu e ex minister di Infrastructura ta na pleito so e tabata cu fundacion FCCA, pasobra e tabata kier tin mas di bisa di loke ta huridicamente permisibel riba kico ta sosode den e fundacion.
FCCA ta un di e instancianan cu ta cumpli completamente cu e parti di Corporate Governance caminda cu no ta cualkier persona por drenta nan directiva, no ta cualkier persona por ta den e hunta. Esakinan ta mara na cierto exigencianan, contrario na hopi otro fundacion na Aruba. Motibo pa esaki ta pasobra ta trata cu hopi placa, di responsabilidad hopi grandi pa loke ta maneho di esaki y e decisionnan cu ta tuma a base di e maneho cu gobierno tin.
