Diadomingo den e oranan di atardi, e famia-, amistad- y conocirnan a bini hunto na cunucu di Ady Koolman na Rooi Kochi, pa celebra Dia di San Juan, miho conoci como Dia di Dera Gay.
Parlamentario Sue-Ann Ras y presidente di parlamento Ady Thijsen, ambos di partido MEP, tabata presente pa e ocasion aki. “Den un ambiente familiar y hopi festivo a duna balor na loke ta nos tradicion y cultura, specialmente pa e bario eybanda, cu tabata conoci pa plantacion tambe”, Ras a cuminsa na describi e momento cultural aki.
CORTA CINTA Y BAILE
Parlamentario Ras y e Presidente di Parlamento Thijsen ambos a haya e honor pa corta cinta di e pista di baile di Dera Gay. “Tabata un atardi hopi folclorico, unda cu grandi y chikito a bin celebra un tradicion y duna balor na nos cultura” Ras a sigui bisa. El a manda un palabra di pabien na sr. Ady Koolman y henter famia cu pa di 10 aña consecutivo ta organiza e celebracion di Dia di San Juan den cunucu di zuid, manteniendo nan tradicion y engrandeciendo nos cultura. Riba e combinacion di potret por haya un impresion di e ambiente cultural.
