Nos ta den un situacion caminda ta wordo exigi di nos pa nos mantene distancia Social, pa bienestar di nos mes, y nos prohimo, mayoria di nos ta bisti un mondkapje pa cuida curpa di e coronavirus.
Pero beibel ta splica nos di cosnan cu nos mester distancia nos mes for di dje,pa nos bienestar Spiritual y material.
Salmo 1 (Uno) vers 1 ta bisa lo siguiente : Bendiciona ta e hende cu no ta cana den conseho di Malvado, ni ta para den caminda di pecador, ni ta sinta riba stoel di bofonador.
Cana den conseho di malvado ta nifica hende cu ta tuma conseho y mentira cu otro hende ta papia y no ta busca pa sa e berdad, pero ta continua den mesun error, di esnan cu tabata prome cu nan. Beibel ta bisa cu e luz a bini pero nan ta stima scuridad.
Para den caminda di pecador ta , ora bo sa masha bon cu un hende ta haci robez, pero bo no por bise pasobra bo ta depende di dje pa un fabor, y bo ta prefera di ta bon cu e persona, enbes di bise su berdad, y asina drecha bo relacion cu Dios. Beibel ta bisa cu bo no por stima Dios y e mundo.
Sinta riba stoel di Bofonador ta nifica, anda cu hende nan cu conoce Dios y cu ta ninga su poder, cu ta pidi hende haci oracion pa nan mientras cu nan mes no ta kere, hende cu ta pratica religiosidad mas ta nenga di entrega nan curazon completamente, na Dios, nan tin Dios pa solamente pa temporada den nan curazon, ora nan tin mester di Dios, bo ta mira nan, ora cos drecha, nan a lubida riba Dios. Hendenan cu ta chercha e berdadero siervo di Dios y ta waknan diferente, pasobra nan ta para riba e Palabra di Dios.Un bofonador aunke e mira un cambio den bida di un hende, toch e ta sigi recorde su pasado pasobra e no kier reconoce y duna honor na Dios cu por cambia hende. Un bofonador ta cana bisa cu ningun instancia, ni Iglesia, ni misa no por yude, pasobra ta e mes tin cu entrega su curazon na Dios pa Dios por cambia su situacion. Pasobra hende no por depende di hende , sino di cada Palabra cu ta sali for di boca di Dios.
POVERBIO 6 VERS 16-19 Ta bisa asina: Tin seis cos cu Dios ta odia, y siete cos cu ta un abominacion pa Dios: Wowo nan halsa, Lenga mentiroso, Man cu ta liher pa drama sanger, Curazon cu ta planea maldad, Pia cu ta lihe pa corre haci maldad, Testigo falso cu ta papia mentira, Y esun cu ta sembra desunion entre ruman.
Mescos cu bo ta preveni Covid -19 pa drenta bo curpa, bo cas y bo famia, tene cuenta cu tur locual ta ariba menciona den e mensahe aki.
Pasobra Salmo 1 ta bisa cu si bo mantene e cosnan aki lew for di bo bida, lo bo ta manera un mata planta na canto di un riuw, cu ta duna fruta na su tempo, cu su blachi no ta marchita y tur locual bo haci lo bo prosepra. Prosperidad ta bini di Dios y no di hende.
Esaki ta e berdadero distancia social cu hende mester tene pasobra nos mester tin temor di Dios den nos bida, pa nos por crece spiritualmente, y pa nos por ricibi bendicion di Dios.
Nos cas y nos famia ta bendiciona ora nos como mayor obedece Dios y instrui nos yuuinan den caminda di Dios.
Nunca no ta laat, cuminsa awe mes, mantene distancia social for di maldad y Dios lo respaldabo den tur locual cu bo ta haci.
