E investigacion relaciona cu caso Avestruz ta continua. Prome cu fin di siman dos oficina di mesun doño a haya bishita di team investigativo cu e caso.
E ta oficina di Trustkantoor ta situa den Belgiestraat na Aruba. E otro ta situa na Corsou. RST y tambe Landsrecherche ta encarga cu e investigacion. E Trustkantoor ta di famia fam L. Kico exactamente nan ta buscando no ta conoci. Por bisa si cu a confisca cierto material den ambos entrada hudicial entre Aruba y Corsou.
Si e entradanan aki lo yuda pa haya e material cu husticia mester pa e caso Avestruz no ta conoci. Tampoco ta descarta mas entrada hudicial. Dos caso ta andando simultaneamente awor aki. Caso Avestruz cu a cuminsa prome y tambe caso Flamingo. Caso Avestruz tin ex minister Benny Sevinger como sospechoso mientras cu caso Flamingo tin ex minister Otmar Oduber como sospechoso. Loke sigur por bisa cu desde cu a haci entrada hudicial como dos aña pasa, te cu awe no a yama esnan envolvi pa interogacion.
Ex minister Benny Sevinger no a ser interoga y varios otro cu a papia cu nan y cu ta sospechoso tampoco a ser interoga. Despues di haci hopi entrada hudicial y dos aña pasando, ainda e proceso of e momento pa interoga e sospechosonan no a yega. Esey nifica cu ainda por spera hopi luna mas prome cu bisa cu e caso ta cera. Keto bay autoridad ta buscando evidencia door di haci un sin fin di entrada hudicial.
