Tin un situacion tenso reinando den refineria di Aruba. No solamente pa e incertidumbre di loke ta nan futuro, y cu e hecho cu no ta hayando reunion cu Gobierno. Pero tambe pa e inseguridad cu e instalacionnan ta.
E sindicato IOWUA, cu ta representa esnan trahando eyden, a bisa por medio di su presidente Boy Anthony, a expresa den un declaracion duna cu si e luga ta sigur nan lo no subi ningun tanki y tampoco lo atende cu barconan treciendo combustibel.
Den ultimo lunanan tabatin diferente encuentro cu entre otro Minister di Labor. E impresion cu e sindicato a haya ora cu a sinta na meas cu tur partidonan envolvi ta cu RDA lo tuma tur e trahadonan over, esta e terminal. Hasta a bisa cu tin interesado y mientrastanto RDA lo sigui paga e trahadonan, vendornan y contratistanan.
Pero despues di bishita na Hulanda, e Prome Minister a bolbe bisando cu e situacion financiero ta malo.
Anthony a bisa tambe cu e refineria ta den masha mal condicion. E waf unda e producto ta sali pa reparti na Aruba, ta den hopi mal condicion. Tin control cu a wordo haci caba. Si mester sosode algo cu no por saca e productonan, door di peligro na waf, e economia di Aruba lo ta stagna.
E sindicato ta hopi preocupa pa henter e situacion den waf na San Nicolas. Esey ta un mensahe cu e kier manda pa Gobierno. E ta bisa cu no tin tempo pa warda riba un otro operador, pasobra e condicion di e planta ta bayendo atras. E tankinan di gasolin y diesel ta den mal condicion. Ya caba a coopera pa wanta e luga na bida, pero si e luga ta “unsafe” e trahadonan no ta bay coopera mas. “Nos no ta coopera ni cu CTGo ni cu niun hende. Nos bida ta mas importante cu e luga aki. Si no drecha e luga, e consecuencia ta pa nan mes,” Anthony a splica.
Recientemente tabatin un structura riba waf cu a kibra gewoon, unda e barco ta mara. E ta bisa cu esun responsabel pa mantene e luga aki ta RDA. “Si algo pasa ta henter Aruba ta keda perhudica, p’esey ta importante pa drecha e situacion den refineria.”
Tambe a lansa advertencia cu si mishi cu nan contracto colectivo lo bay Corte. P’esey e ta bisa empleadonan cu uni ta logra cu nan derechonan ta wordo respeta.
