Manera ta custumber di tur aña, Centro di Bario Playa Pabou tambe a celebra Aruba su dia nacional di himno y bandera.
Riba 18 di maart, Centro di Bario Playa Pabao a tene un bunita atardi cultural den bario. Dennis Burke, Presidente di Centro di Bario Playa Pabao a cuminsa cu nan tabatin un tremendo di celebracion, cu diferente presentacion y poetanan cu a declama nan poesia. Tabatin diferente gruponan di baile cu a presenta, entre otro, Gucci Dancers, como tambe Theater di Danza di Aruba, Pierewietje, baile di cinta di Lia Lopez.
Riba e atardi aki tambe a reconoce algun personahe di bario, manera Edgard ‘Chuchi’ Perez, ganado Premio Cultural Playa Pabao 2024 como tambe Lia Lopez, como Tanchi di Cultura, pa nan cooperacion di semper.
E actividad aki a cuminsa chikito, pero a sigui crece aña pa aña y ya nan tin mas di binti aña ta organisando e actividad aki.
Tur aña, e comision organisado ta bin cu caranan fresco y no keda cu mesun artistanan di semper. Ta duna oportunidad na cada un artista pa duna nan presentacion na Centro di Bari Playa Pabao.
E aña aki e preparacionnan tabata mas druk cu normal, door cu siman pasa, dia 8 di maart nan a tene un encuentro relaciona cu Dia Internacional di Dia di Hende Muhe y ya e siman despues mester a cuminsa prepara pa e dia grandi aki. Pero nan ta hacie cu hopi amor pa e pueblo.
Nan ta contento cu e acogida cu nan ta ricibi cada biaha di nobo for di e pueblo di Aruba, cu ta duna nan mas smaak di sigui traha pa e bario y pa e pueblo.
Na final, Burke a gradici tur esunnan cu yuda den prepara y durante e actividad, ya cu sin nan, sin e boluntarionan e actividad lo no tabata posibel.
