Diabierna ultimo corte a trata e caso penal contra un mucha homber di 20 aña pa posesion di arma di candela. Hay’e culpabel y a haya un castigo combina.
Shancarlo Carlo Vrolijk ta doño di un revolver cu el a bay cu ne na cas di su amigo Phelipa. El a laga esaki poni riba mesa. Den corte el a nenga cu e arma ta di dje, pero tin declaracion di Phelipa cu ta bisa otro cos.
Su amigo di 23 aña, segun declaracion di e chick, tabata hunga cu e revolver, e wega di ruleta Ruso. El a bisa den su prome declaracion cu Shancarlo a bin cu e arma y a pone riba mesa. Dado momento Phelipa, segun e amiga, a mik riba dje y a klik e arma. “Mi a spanta hopi. Pero el a bisa mi na harimento no spanta, e no tin bala den dje.”
E mucha homber di 23 aña a sigui cu e wega y a pone e arma na su cabes y a klik atrobe. Y e biaha ey si, segun e testigo, el a scucha e tiro zona duro. El a core bay den baño sconde y despues di un rato el a bolbe pa mira su amigo / pareha na suela.
E acusado sinembargo ta bisa cu e no tabata na e cas ora cu e echo a tuma luga. Pero ta e amiga a yam’e pa inform’e kico a pasa. El a core bay na e sitio.
Pero esey, segun fiscal, e no ta compronde. Si e no tabata na e sitio, si e arma no ta di dje, pakico el a pasa man cu e revolver y a bay cu ne for di e sitio. “Tabata mas facil entregue na Polis,” el a bis’e. Riba esaki e no por a duna un contesta concreto. Echo ta cu, segun su declaracion, el a bay un cas di amigo, kende no kier a dun’e ayudo y despues a dicidi di tira e arma den un dam. Na final polis a arest’e
E tabata envolvi den otro caso mas, pero den luna di mei aña pasa. A acus’e di maltrato y violencia publico.
Pa fiscal tur e acusacionnan ta proba pa cual el a pidi 12 luna di cual 3 luna ta condicional y 3 aña di prueba.
Hues no tabatin mester tempo di pensa y a dicta sentencia mesora. El a conclui cu e acusacionnan ta proba, menos e maltrato. E parti ey no por a mira bon riba e filmacion. “Bo merece un castigo mas pisa,” hues a bisa e acusado. Pero a tene cuenta cu el a pasa den un momento traumatico. Su amigo a perde su bida den un forma tragico hungando cu su arma.
Na final a dun’e 15 luna di cual 6 luna ta condicional y dos aña di prueba.
