Diahuebs mainta e trahadonan di Food & Beverage di Holiday Inn a pone trabou abou. Ta trata aki di un protesta pa demostra nan malcontento cu gerencia di e hotel. Sandra Curtis, director di Human Resources a splica cu desde un principio a acorda cu diabierna awo lo bay vota riba peticion di e trahadonan y cu e no ta compronde pakico diripiente nan a bin cu protesta. El a lamenta esaki debi cu e accion a afecta nan orario di duna servicio di desayuno n’e turistanan. A cuestiona tambe si ta un falta di comunicacion entre e trahadonan y nan sindicato.
Segun Pedro Mauricia, trahado di F&B na Holiday Inn a splica cu tur e tempo ki nan a purba negosha den nan CAO nobo y cu tur departamento tin malcontento y cu awe nan a dicidi cu ta basta y a uni pa demostra esaki tambe. Mauricia a bisa cu na final di dia, t’e empleadonan ta duna e hotel di come. Segun el a sigui splica, nan a entrega un propuesta saca e managernan for di nan sistema di punto. Ta trata aki di un service charge a base di punto y ta repartio esaki bou di e trahadonan di Food & Beverage y na Holiday Inn, e managernan tambe ta haya di esaki. Pa e ultimo aki, e trahadonan no ta di acuerdo cu esaki ya cu ta di opinion cu ta esunnan cu ta eherce e trabou so tin derecho riba esaki.
Na su turno Hose Figaroa, presidente di sindicato FTA a splica cu nan a negosha den e CAO cu nan kier pa solamente e trahadonan cay bou di esaki y no gerentenan mas. Pues, ta tambe a splica cu ta solamente esunnan cu ta labora tin derecho riba e puntonan aki.
Tur esaki a provoca malcontento bou di e trahadonan cu a pone cu nan a pone trabou abou diahuebs mainta pa expresa esaki, manera ta nan derecho. Pa 11:00 am nan lo bolbe sinta na mesa cu gerencia pa wak si lo bay cambia esaki pa asina tur hende bolbe bek na pia di trabou.
